Në veri të Mitrovicës, serbët lokalë kanë paralajmëruar një protestë këtë të hënë në orën 12:00, për të kundërshtuar vendimin e Bankës Qendrore të Kosovës për ndalimin e dinarit si mjet pagese.
Thirrja për protestë është bërë edhe nga Lista Serbe në rrjetin social Facebook.
Zëvendësdrejtori i policisë për rajonin e veriut, Veton Elshani, ka konfirmuar se autoritetet janë të përgatitur për ta monitoruar protestën.
Në katër komunat veriore të Kosovës, ku shumica e popullsisë janë serbë, ditën e diele janë vërejtur disa grafite me shkrimin “Kur të kthehet ushtria në Kosovë, Brigada e Veriut jeton”.
Kryeministri i Kosovës, Albin Kurti, ka sqaruar se vendimi i Bankës Qendrore nuk pengon Serbinë për të ndihmuar komunitetin serb dhe se Kosova nuk ka ndaluar përdorimin e dinarit.
Ai ka theksuar se euroja duhet të jetë monedha e vetme e pranueshme për transaksionet me para të gatshme.
Banka Qendrore ka bërë të ditur se Rregullorja e tyre nuk ndalon pranimin e mjeteve në llogaritë bankare në Euro dhe nuk kufizon aktivitetin këmbimor të valutave nga institucionet financiare.
Kryesisht në katër komunat veriore, operojnë degë bankare dhe institucione mikrofinanciare.
Ndryshimet në sistemin bankar, si hapja e llogarive pa tarifë për grupet e cenueshme, janë pjesë e objektivave të Bankës Qendrore të Kosovës për përfshirjen financiare në këtë zonë.
