Bashkimi Evropian mund ta sanksionojë gazetarin amerikan, Tucker Carlson, pasi paralajmëroi se do ta intervistojë liderin rus, Vladimir Putin, ka raportuar “Newsweek” të mërkurën.
Carlson ka vizituar Rusinë këtë javë dhe të martën e bëri të ditur se së shpejti do ta publikojë intervistën e zhvilluar me Putinin. Zyrtarë dhe ish-zyrtarë të Bashkimit Evropian i kanë thënë mediumit amerikan se Carlsonit, ish-gazetar i Fox-it, mund t’i ndalohet qarkullimi në vendet e BE-së.
“Meqë Putini është një kriminel lufte dhe BE-ja i sanksionon të gjithë ata që e ndihmojnë atë në këtë përpjekje, duket e logjikshme që Shërbimi i Jashtëm të shqyrtojë edhe rastin e tij”, ka thënë anëtari i Parlamentit Evropian, Guy Verhofstadt.
Kjo pritet të jetë intervista e parë e Putinit për një media perëndimore qëkur e filloi agresionin ndaj Ukrainës.
Në një deklarim të shkurtër, Carlson është shprehur se “shumë amerikanë s’e kanë idenë pse Putini pushtoi Ukrainën ose cilat janë qëllimet e tij”.
“Nuk jemi këtu sepse e duam Vladimir Putinin…Ne nuk po ju nxisim të pajtoheni me atë që Putini mund ta thotë në këtë intervistë, por po ju nxisim ta shikoni. Duhet të dini sa më shume që të mundeni”, është shprehur ish-gazetari i Foxit që ishte pushuar nga puna, me dyshimin për përfshirje në shpërndarjen e lajmeve të rreme gjatë zgjedhjeve presidenciale në SHBA.
