Kazinotë në zonën problematike në kufirin me Serbinë janë rikthyer sërish, por kësaj radhe jo në Karaçevë të Kamenicës. Ato ndodhen krejt afër, në zonën në të cilën autoritet ligjor ushtron Serbia. Në kushte anonimiteti, qytetarë i kanë thënë KOHËS këto lojëra fati frekuentohen kryesisht nga kosovarët. Në Prokurorinë e Gjilanit kanë bërë të ditur se deri më tash për veprimtarinë e bixhozit të paligjshëm në Karaçevë janë të akuzuar 78 persona.
Veç shtatë muaj prej operacionit të Policisë së Kosovës për mbyllje të kazinove në Karaçevë të Kamenicës, ato janë rikthyer.
Por, kësaj radhe janë hapur pak metra më larg, në një zonë ku shteti i Kosovës nuk ka kompetenca të ushtrojë autoritet.
Një kazino që ka qenë, e katër të tjera që janë ngritur rishtazi, kanë zënë vend në tokën që është territor i Serbisë.
Rrjeti i këtyre kazinove ka gjetur formulën se si të operojë legalisht përskaj kufijve të vendit që e ka shpallur të paligjshëm bixhozin.
Nga Policia në Gjilan kanë thënë për KOHËN se në zonën e fshatit Karaçevë nuk zhvillohet aktivitet i lojërave të fatit që nga operacioni i Policisë i vitit të kaluar. Sipas tyre, kazinotë që po operojnë këtu janë në fshatin Breznicë të Komunës së Bujanocit, që i takojnë territorit të Serbisë.
Kësisoj, 5 kazinotë të ndërtuara në objekte montazhi, haptazi shfaqin veprimtarinë që ushtrojnë dhe punojnë pa ndonjë telash ligjor, meqë shteti serb e ka të lejuar operimin e lojërave të fatit, ndryshe nga Kosova që e ka ndaluar me ligj në maj të 2019-s.
Nga ajo që qytetarët i kanë thënë KOHËS në kushte anonimiteti, lojërat e fatit në atë pjesë frekuentohen me interes të madh nga kosovarët.
Shumë pak metra më poshtë se këto lojëra të fatit, Policia e Kosovës, vitin e kaluar kishte rrënuar tri kazino, kishte arrestuar disa persona dhe kishte konfiskuar një varg provash, në mesin e të cilave 96 aparate.
Në Prokurorinë Themelore të Gjilanit i kanë thënë KOHËS se për organizimin e bixhozit të paligjshëm në Karaçevë deri më tani janë të akuzuar 78 persona.
“Ju njoftojmë se në bazë të informacioneve, kazinotë të cilat janë tani aktive, nuk gjenden në territorin e Republikës së Kosovës. Prokuroria Themelore në Gjilan, në koordinim me Policinë e Kosovës, në mënyrë aktive janë marrë me hetimin e veprave penale të organizimit të skemave piramidale dhe bixhozit të paligjshëm, në këtë regjion”, ka thënë Prokuroria Themelore në Gjilan.
Në Karaçevë dy vjet më parë Policia e Kosovës kishte ndërmarrë një ndër operacionet më të mëdha policore, ku përveç rrënimit të objekteve kishte arrestuar 33 persona, mes tyre 10 zyrtarë policorë.
