Drejtori i Institutit i GAP, Blendi Hasaj, ka thënë se nëpërmjet rastit të Bechtel-Enkas, buxheti i shtetit ishte dëmtuar qëllimshëm nëpërmjet një projekti të vetëm disamilionësh, e sipas tij, zhvatjet “pa asnjë arsye logjike”, kishin ndodhur edhe në procese të tjera.
Sipas Hasajt, ndërmarrjet publike në të kaluarën janë dëmtuar duke i ndalë investimet në to, që më pas ndonjë biznes t’i privatizojë ato.
“Kur pyet dikush se pse Kosova nuk ka arritur të bëjë progres më të madh pas luftës, dhe kur thonë të mos merremi më me të kaluarën, është mirë vetëm me ua prezantu sesi resurset më të mëdha shtetërore janë investuar në atë se qysh: Me e dëmtu shtetin me nga 40 milionë euro në një projekt të vetëm, siç e vërtetoi edhe sot gjykata se në rastin me Bechtel Enkan është keqpërdorë detyra zyrtare e dëmtu me dashje buxheti i shtetit”, ka shkruar Hasaj në Facebook.
Drejtori i GAP-it ka shtuar se kur shteti punon kundër vetes, ka ngecje, e kur qindra-miliona euro shkojnë “në xhepa të disave, s’ka më edhe mjete për aktivitete që nxisin zhvillimin”.
Ish-ministri Pal Lekaj u dënua të mërkurën (31 janar) me 3 vjet e 8 muaj burgim nga Gjykata Themelore në Prishtinë për rastin e 53 milionë eurove.
