Kohët e fundit është raportuar se nëpër botë ka shumë raste të infektimit me virusin Covid, si dhe grip sezonal, me simptoma që po zgjasin më shumë se zakonisht, raporton Reuters.
Pas këtyre raportimeve e shqetësuar u shfaq Organizata Botërore e Shëndetësisë (OBSH) për shkak se sipas të dhënave të saj, niveli i vaksinimit është i ulët në krahasim me rastet që po raportohen me këto sëmundje çdo ditë.
Kjo gjendje ka mbingarkuar institucionet shëndetësore nëpër botë, pasi në SHBA, në disa shtete evropiane e nëpër vende të tjera në botë, hospotalizimet me këto infeksione janë gjithnjë në rritje.
Në rritje është edhe numri i vdekjeve të personave të moshuar në disa vende, edhe situata thuhet se nuk është alarmante, krahasuar me pikun e vdekjeve nga Covidi.
Qeveria s Spanjës ka rivendosur masat duke iu kërkuar qytetarëve vendosjen e maskave dhe praktikimin e masave të tjera mbrojtëse. Njëjtë kanë bërë edhe disa institucione shëndetësore në SHBA.
“Shumë njerëz kanë nevojë për kujdes serioz mjekësor për gripin dhe Covidin, kur ne mund ta parandalojmë atë”, ka thënë Maria Van Kerkhove, zyrtare në OBSH.
Ajo gjithashtu ka thënë se numri i të vaksinuarve është esktremisht i ulët nëpër shumë vende përgjatë kësaj sezone.
Ekspertët e sëmundjeve kanë vlerësuar se qeveritë nëpër botë kanë dështuar në fushatat vetëdijesuese lidhur me rreziqet që paraqet ende COVID dhe përfitimet nga vaksinimi, që kur emergjenca globale e shëndetit publik u shpall si e përfunduar në maj të vitit 2023.
Bazuar në statistikat që ka bërë Qendra e Kontrollit të Sëmundjeve në SHBA, vetëm 19% e të rriturve në SHBA kanë marrë vaksinën kundër Covid këtë sezone, pavarësisht se vazhdimisht është bërë thirrje për vaksinim.
“Ne nuk mendojmë se njerëzit janë vaksinuar sa duhet kundër Covid. Njerëzit ende nuk e kuptojnë se Covid është ende një sëmundje më e rëndë se gripi”, tha drejtori i kësaj Qendre, Mandy Cohen, në një intervistë.
Muajin e kaluar 850 mije raste të reja me Covid dhe 118 mijë hospitalizime të reja u raportuan në nivel global, me rritje nga muaji nëntor prej 52, respektivisht 23%, sipas OBSH-së, e cila shtoi se shifrat aktuale ka gjasa të jenë edhe më të larta.
