Kryeministri i Kosovës, Albin Kurti, i ka kërkuar homologut të tij irlandez Leo Varadkar mbështetje për statusin kandidat në Bashkimin Evropian, ndërsa ka falënderuar Irlandën për mbështetjen që i ka dhënë Kosovës gjatë etapave të ndryshme të historisë.
Në një konferencë për media pas takimit në Prishtinë, Kurti ka thënë se Kosova e ka si frymëzim zhvillimin e shtetit të Irlandës.
“Irlanda është frymëzuese për ne sepse kemi ngjashmëri që i ndajmë. Nga pikëpamja shoqërore, popujt tanë shquhet për mikpritje të ngrohtë. Të dy shtetet gëzojnë aleancë dhe lidhje të palëkundur me SHBA-në. Fokusi ynë është kah rritja thelbësore dhe rritja sociale”, ka thënë Kurti.
Shefi i Qeverisë ka thënë se presin që në të ardhmen të thellojnë miqësinë me Irlandën.
“Ne presim që të thellojmë miqësinë mes dy vendeve tona dhe të mësojmë më shumë nga përvojat e sukseset e Irlandës. Irlanda është mbështetëse e Këshillit të Evropës dhe në anëtarësimin tonë në BE, për çka kërkuam mbështetje për statusin kandidat. Irlanda po ashtu ka dhënë kontribut të hershëm që e vazhdon edhe sot përmes misionit të KFOR-it. Populli i Kosovës është gjithnjë falënderues”, ka deklaruar Kurti.
