Ish-guvernatori i New Jerseyt, Chris Christie, është larguar nga gara presidenciale nga radhët e republikanëve me kritika të ashpra ndaj kandidatit kryesor Donald Trump, shkruan BBC.
“Unë do të sigurohem që në asnjë mënyrë nuk do t’i mundësoj Donald Trumpit të jetë përsëri president i Shteteve të Bashkuara”, ka thënë aleati i Trumpit, i kthyer në kritik.
Republikani Christie ishte përballur me presion për të hequr dorë nga gara dhe për të lejuar partinë të bashkohet vetëm rreth një kundërkandidati të Trumpit.
Megjithatë, Christie nuk përkrahu asnjërin kandidat teksa hoqi dorë nga gara. Kritikoi të gjithë kandidatët e mundshëm.
Ai i luti votuesit republikanë për të refuzuar ish-presidentin Trump, të cilin ai e akuzoi se “e ka vënë veten përpara popullit të këtij vendi”.
“Donald Trump dëshiron që ju të jeni të zemëruar çdo ditë sepse ai është i zemëruar”, shtoi ai.
Largimi i tij vjen pesë ditë përpara zgjedhjeve parlamentare të Iowas, e para nga garat shtet pas shteti, në të cilat votuesit republikanë do të zgjedhin kandidatin e tyre të preferuar për president.
Fituesi eventual do të emërohet kandidati republikan në korrik, përpara se të vazhdojë të sfidojë kandidatin demokrat – me gjasë Joe Bidenin – në zgjedhjet e përgjithshme të nëntorit.
