Kryeministri i Kosovës, Albin Kurti, ka “garantuar” qytetarët e Kosovës se çdo marrëveshje që do të nënshkruhet me Serbinë do të jetë në të mirë të vendit që ai udhëheqë.
Këto komente, Kurti i bëri përmes një video-adresimi të shtunën, në prag të vitit të ri, ku foli për “sukseset” e qeverisë së tij përgjatë vitit 2023.
Kryeministri theksoi se vitin 2023 po e mbyll edhe me mbështetjen e aleatëve, duke iu referuar Bashkimit Evropian dhe Shtetet e Bashkuara të Amerikës, ndonëse masat ndëshkuese që ishin vendosur ndaj Kosovës për shkak të veprimeve të qeverisë në Veri, nuk janë larguar akoma.
“Po e mbyllim vitin edhe me mbështetjen e aleatëve tanë, ndërkohë që përgatitemi për të ardhmen me sa më shumë progres në vlerat themelore të demokracisë e të drejtave të njeriut, e më interesa të përbashkëta me Bashkimin Evropian dhe Shtetet e Bashkuara të Amerikës”, tha Kurti.
E ky bashkërendim me partnerët perëndimor, sipas Kurtit, merr edhe më shumë rëndësi kur siguria e Evropës dhe rajoneve të ndryshme anë e mbanë botës, po kërcënohet nga forca destabilizues.
Kosova, në vlerësimin e kreut të ekzekutivit, “merret si shembull i shtetit të së drejtës, parimeve demokratike dhe antitezë e autokracisë dhe tiranisë”.
“Bashkëpunimi ynë me aleatët përfshin qasjen tonë konstruktive në procesin e normalizimit të marrëdhënieve me Serbinë, me synimin për të sjellë paqe dhe siguri dhe për të hequr barrën që do ta ngadalësojë rritjen e prosperitetin tonë”, shtoi.
“Në këtë proces të vazhdueshëm dhe në bisedime të gjata që kanë paraprirë e do të vazhdojnë”, vazhdoi kryeministri, “do të doja të siguroja qytetarët se çdo marrëveshje që do të nënshkruhet do të jetë në të mirë të vendit tonë dhe nuk do të kërcënojë sigurinë e integritetin territorial, kushtetutshmërinë e rendin ligjor të vendit tonë”.
