Deputeti i Lëvizjes Vetëvendosje, Adnan Rrustemi ka akuzuar Avokatin e Popullit, Naim Qelaj se po do që të ndikojë në proces zgjedhor, pasi ky i fundit paralajmëroi që Ligjin për Zgjedhje do ta dërgojë në Gjykatë Kushtetuese.
Rrustemi ka shkruar në Facebook se Ligji për Zgjedhjet e Përgjithshme daton prej vitit 2008, ndërkaq Ligji për Barazi Gjinore është në fuqi prej vitit 2015. Sipas tij, Qelaj është zgjedhur Avokat i Popullit në shtator të vitit 2020.
Sipas tij, dërgimi i këtij ligji në Kushtetuese nuk ka të bëjë me mbrojtjen e kushtetueshmërisë.
“Sot avokati Qelaj, po na tregon se si në vitin e katërt të mandatit të tij do ta dërgojë në Gjykatë Kushtetuese ligjin e ri për zgjedhje për një dilemë që ka ekzistuar që 8 vjet, por që po e ngritë vetëm në vitin e fundit të qeverisjes së LV, e para zgjedhjeve të reja në të cilat për herë të parë, me ligjin e ri, do të mundësohet votimi i mërgatës në ambasada. Kjo nuk ka të bëjë me mbrojtjen e kushtetushmërisë. Kjo është përpjekje për të ndikuar proces zgjedhor.
