Ministrja Haxhiu ka pritur në takim, zv. Ndihmës Sekretaren e SHBA në Byronë Ndërkombëtare të Narkotikeve dhe Çështjeve të Zbatimit të Ligjit (DAS INL) Johnson
Sot në hapësirat e Ministrisë së Drejtësisë, Ministrja e Drejtësisë, Albulena Haxhiu ka pritur në takim një delegacion të prirë nga Zv. Ndihmës Sekretarja Lisa Johnson dhe Ambasadori amerikan Jeffrey Hovenier, përcjellë KosovaNews.
Përmes një komunikate për media, thuhet se ministrja Haxhiu e ka quajtur bashkëpunim të shkëlqyer me Ambasadën Amerikane në Kosovë, e cila ndër të tjera, përmes programeve si INL, OPDAT dhe ICITAP vazhdon të mbështesë procese të rëndësishme të sundimit të ligjit në Republikën e Kosovës.
“Sundimi ligjit, lufta anti-korrupsion, procesi i vetingut në sistemin e drejtësisë-duke përfshirë edhe aspektet e drejtësisë penale, ishin tema të cilat zgjuan interesim nga zv.ndihmës sekretarja Johnson, duke trajtuar po ashtu me një vëmendje të shtuar angazhimin e Ministrisë së Drejtësisë në nismat e saj që parandalojnë dhe luftojnë dukurinë e dhunës në familje.
Në kuadër të agjendës së SHBA-ve në luftën globale kundër korrupsionit, znj. Johnson e vlerësoi si partner të rëndësishëm Republikën e Kosovës, për çka vlerësoi se ky bashkëpunim do të sjellë edhe rezultatet e saja në forcimin dhe zbatimin e ligjit dhe rendit juridik.
Të dy palët u pajtuan që bashkëpunimi i deritanishëm ka sjellë rezultate të mira dhe se i njëjti do të vazhdojë edhe më tej për t’i kontribuar forcimit të sundimit të ligjit dhe drejtësisë në Kosovë”, thuhet në komunikatë.
