Një gruaje, e quajtur dikur si “nëna më e keqe e Australisë”, i është shfuqizuar dënimi për vrasjen e katër fëmijëve të saj, shkruan BBC.
Gjykata e Lartë e Uellsit të Ri Jugor vendosi të enjten se provat e përdorura për të burgosur Kathleen Folbiggin ishin “jo të besueshme”.
56-vjeçarja u fal dhe u lirua nga qeveria e shtetit në qershor, pas 20 vjetëve burgim.
Folbigg mirëpriti lajmet e fundit, por ka thënë se provat e pafajësisë së saj ishin “injoruar dhe hedhur poshtë” për dekada të tëra.
“Sistemi preferoi të më fajësonte mua në vend që të pranonte që ndonjëherë fëmijët mund të vdesin papritmas”, ka thënë ajo jashtë gjykatës të enjten.
Rasti i Folbiggit është përshkruar si një nga gabimet më të mëdha të drejtësisë në Australi.
Ajo kishte të bënte me vdekjen e katër fëmijëve të saj të mitur Caleb, Patrick, Sarah dhe Laura – secili prej të cilëve vdiq papritur midis viteve 1989 dhe 1999, në moshën 19 ditë deri në 18 muaj. Prokurorët në gjyqin e saj pretenduan se ajo i kishte mbytur ata.
Rasti u mbështet në prova rrethanore, duke përdorur ditarët e Folbiggut – të cilët nuk u ekzaminuan kurrë nga psikologët apo psikiatër – për ta përshkruar atë si një nënë të paqëndrueshme, të prirur për tërbim.
