I dërguari i BE-së, Miroslav Lajçak, ka njoftuar se ka arritur nënshkrimi i marrëveshjes mes KEDS-it dhe Elektroserverit për çështjen e energjisë elektrike.
“E mirëpres nënshkrimin e sotëm të kontratës komerciale mes KEDS-it dhe Elektroserverit. Ky është hap i rëndësishëm në implementimin e Udhërrëfyesit për Energjinë të lehtësuar nga BE-ja dhe në rrugën e normalizimit të marrëdhënieve mes Kosovës dhe Serbisë”, ka shkruar ai në platformën X.
Udhërrëfyesi thoshte se Elektroserveri do të nënshkruante marrëveshjet e nevojshme brenda afatit që nga lëshimi i licencës, megjithatë ishte kritikuar se s’po e bën një gjë të tillë.
Marrëveshja për Energji parashihte që qytetarët në veri të Kosovës të paguajnë për rrymën e shpenzuar nga vjeshta e vitit 2022 – për herë të parë pas më shumë se dy dekadash.
Elektrosever është në pronësi të kompanisë energjetike të Serbisë – EPS (Elektroprivreda Srbije), por në Kosovë është themeluar me ligje të Kosovës.
Kjo kompani është paraparë të bëjë edhe furnizimin, edhe faturimin e rrymës së shpenzuar në veri të Kosovës – pjesë e banuar me shumicë serbe.
Licencimi i saj është paraparë me Marrëveshjen midis Kosovës dhe Serbisë për Energjinë, e cila është arritur në vitin 2013, por pajtimi për zbatimin e kësaj marrëveshjeje, apo udhërrëfyesin, është arritur më 21 qershor 2022.
I welcome today’s signature of the commercial contract between KEDS and Elektrosever. This is an important step in implementing the 🇪🇺-facilitated Energy Roadmap and on the path to normalisation of relations between Kosovo and Serbia. Congratulations to all who made it possible!
— Miroslav Lajčák (@MiroslavLajcak) December 9, 2023
