Me një pankartë në të cilën shkruante “pe bon Zajednicën” dhe “po e don pushtetin”, Partia Socialdemokrate ka protestuar ndaj kryeministrit Albin Kurti gjatë fjalimit të tij të enjten në mbrëmje në “Ulpiana Forum”.
PSD-ja po ashtu gjatë këtij aksioni ka lëshuar një deklaratë të kamotshme të Kurtit me togfjalëshin “Zajednica nuk kalon”.
“Para pak çastesh PSD-ja ia ndali fjalimin Kryeministrit duke ia lëshuar me zmadhues veten e tij kur e mohonte Zajednicën. Sot, për ta ruajtur pushtetin e vet, Zajednicën po ia sjell Kosovës. Nuk do të ketë normalitet me Zajednicën në Kosovë, e me Albin Kurtin kryeministër!” ka shkruar Dardan Molliqaj, kryetar i PSD-së në Facebook pas aksionit.
Ai po ashtu ka thënë se aktivistja Donjeta Demolli është arrestuar. Këtë arrestim e ka cilësuar të papranueshëm.
“Pushtetit i Albin Kurtit, që Kosovës po ia sjell Zajednicën, po i pengon një parullë që e tregon të vërtetën për të. Po i pengon zëri i tij kur dikur e mohonte këtë Zajednicë. Po i pengon vetja kur shihet në pasqyrë! Por Albin Kurti e di më mirë se kushdo: nuk mund të ketë qetësi e normalitet, me Zajednicën që po ia sjell Kosovës. E mbase kjo po i pengon më së shumti. Kërkojmë menjëherë lirimin e aktivistes së PSD-së Donjeta Demolli!” ka shtuar më tej ai.
Forumi Ulpiana po organizohet nga Ministrja e Punëve të Jashtme dhe Diasporës. “Forumi Ulpiana, si një nga ngjarjet më të rëndësishme ndërkombëtare në vend synon të avancojë marrëdhëniet midis qeverive dhe politikave nëpërmjet angazhimit të diasporës dhe zhvillimit ndërkombëtar”, thuhet në lajmërimin e MPJD-së për këtë ngjarje.
