Kryeministri i Kosovës, Albin Kurti ka pritur në takim ambasadorin e ri të Shqipërisë në Kosovë, Petrit Malaj, ku kanë theksuar rëndësinë e thellimit të bashkëpunimit mes dy vendeve.
Në këtë takim, kryeministri Kurti ka theksuar rëndësinë e marrëveshjeve në mes Kosovës dhe Shqipërisë, zbatimi i të cilave ka ndikim të drejtpërdrejtë në jetën e qytetarëve të të dyja vendeve si dhe të bizneseve.
Në anën tjetër, ambasadori Malaj shprehu përkushtim për thellim të marrëdheniëve mes dy vendeve si dhe shërbimin që do vazhdojë të ia bëjë Kosovës.
“Kryeministri Kurti u takua me ambasadorin e ri të Shqipërisë, Petrit Malaj
Prishtinë, 15 nëntor 2023
Ditën e sotme, Kryeministri i Republikës së Kosovës, Albin Kurti, mirëpriti në takim ambasadorin e ri të Shqipërisë në Kosovë, Petrit Malaj.
Kryeministri Kurti e përgëzoi ambasadorin për detyrën e re. Ai vlerësoi marrëdhëniet vëllazërore mes dy shteteve tona, duke theksuar rëndësinë e thellimit dhe avancimit të bashkëpunimit tonë. Biseduan për rajonin e Ballkanit Perëndimor, ku bashkëpunimi midis shteteve duhet të jetë i bazuar në demokraci e siguri, në orientimin dhe vlerat e NATO-s dhe BE-së.
Kryeministri Kurti veçoi marrëveshjet mes Republikës së Kosovës dhe Republikës së Shqipërisë, zbatimi i të cilave forcon marrëdhëniet tona dhe i sjellë qytetarët më pranë njëri-tjetrit. Ato kanë ndikim të drejtpërdrejtë e pozitiv në jetën e tyre, të bizneseve e më gjerë.
Marrëdhëniet dypalëshe ndërmjet Republikës së Kosovës dhe asaj të Shqipërisë, kanë sjellë nënshkrimin e gjithsejtë 184 marrëveshjeve, protokolleve e memorandumeve.
Ndërkaq, ambasadori Malaj shprehu përkushtimin e tij për të çuar më tej marrëdhëniet tona të shkëlqyera. Ai theksoi që ndihet i nderuar dhe i lumtur që do të shërbejë në Kosovë.
Duke i uruar suksese në këtë angazhim të ri, Kryeministri Kurti e falënderoi ambasadorin Malaj për takimin e bisedën e frytshme.”, thuhet në njoftimin e zyrës së Kryeministrit.
