Drejtori i spitalit Al-Shifa në Gaza, Muhammad Abu Salmiya, theksoi se objekti shëndetësor është shndërruar në një varr masiv shkaku i pamundësisë për të ofruar kujdes pasi që mungon energjia elektrike, uji dhe oksigjeni.
Tanket izraelite janë grumbulluar pranë portave të spitalit Al-Shifa në qytetin e Gazës që nga mëngjesi i sotëm, një ditë pasi zyrtarët shëndetësorë në enklavën e rrethuar thanë se objektet e fundit mjekësore në Gazën veriore ishin mbyllur për shkak të mungesës së energjisë dhe luftimeve të vazhdueshme.
France 24 foli me drejtorin e spitalit për situatën gjithnjë e më të vështirë në Al-Shifa, ku qindra pacientë mbeten të bllokuar, shumë në gjendje kritike, së bashku me mijëra civilë të zhvendosur nga bombardimet e vazhdueshme.
“Tani që gjithçka është prishur, nuk mund të flasim më për spitalin. Brenda ka vetëm mure ku njerëzit mund të vdesin sepse nuk mund të mjekohen. Është një varr masiv. Që nga mëngjesi, shtatë persona të tjerë kanë vdekur nga mungesa e oksigjenit. Tre vdiqën në terapi intensive dhe një në sallën e operacionit. Çdo minutë sa vijon kështu rrezikon të rritet numri i vdekjeve”, theksoi ai.
Drejtori paralajmëroi se stafi mjekësor nuk është më në gjendje të ofrojë asnjë kujdes për pacientët, pavarësisht nga gjendja e tyre.
“Al-Shifa është pa energji elektrike, ujë dhe oksigjen. Tani për tani, një vajzë që vuan nga sëmundjet e zemrës po lufton për jetën e saj çdo minutë sepse ne nuk mund t’i sigurojmë më oksigjen. E pashë me sytë e mi dhe nëse ne ende po të kishte internet do t’i shihja këto të dërgonin vajzat në të gjithë botën. Gjithçka është ndalur, edhe banka e gjakut në spital nuk funksionon. Asnjë i lënduar apo i sëmurë që ka nevojë për gjak nuk mund ta marrë atë”, tha ai.
Ai shpjegoi se askush nuk mund të dalë apo të hyjë më nga ndërtesa.
“Sot në mëngjes nuk ka pasur goditje të drejtpërdrejta, por dje është goditur reparti i kardiologjisë. Ditët e kaluara është goditur edhe reanimacioni dhe obstetrika-gjinekologjia, sot ka pasur një bombardim masiv pranë spitalit, i cili është i rrethuar me tanke”, thotë ai.
I pyetur në lidhje me pretendimet e ushtrisë izraelite se kishte hapur korridoret e evakuimit për të lejuar njerëzit e zhvendosur të largoheshin të sigurt nga spitali, ai tha se kjo nuk ishte e vërtetë.
“Kjo është një gënjeshtër. Do të doja të kishim internetin që të mund të dërgoja një video të këtij korridori, i cili është grumbulluar me kufoma”, shtoi ai.
Ndryshe, Izraeli ka nisur një ofensivë në Rripin e Gazës pas sulmit terrorist të Hamasit në shtetin izraelit.
