Kryetari i Aleancës për Ardhmërinë e Kosovës (AAK), Ramush Haradinaj, i ka cilësuar si shqetësuese të gjeturat e Raportit të Progresit për Kosovën të Komisionit Evropian.
Ai në një deklarim për media para Kuvendit të Kosovës, ka thënë se performanca e qeverisjes është e vlerësuar dobët si dhe është përmendur edhe korrupsioni e çështje të tjera.
“Është pritur që vlerësimi do të jetë me mjaft çështje që janë shqetësuese për vendin edhe janë adresuar shumica e këtyre shqetësimeve. Pra, performaca e qeverisjes është e vlerësuar dobët e po ashtu ka shumë fenomene të cilat janë identifikuar veç e veç. Ju e cekët çështjen e korrupsionit, por ka edhe shume çështje të tjera”, është shprehur Haradinaj.
Sipas tij, Kosova ka ecur mbrapa në marrëdhëniet me Bashkimin Evropian dhe një gjë e tillë është përmendur edhe në Raportin e Progresit.
“Ju jeni në dijeni që ne jemi të ndëshkuar nga BE-ja. Kemi sanksione edhe financiare, ekonomike e politike. E kuptohet pra Kosova nuk është se ka ecur përpara, por ka ecur prapa në marrëdhëniet me BE-në dhe ato reflektojnë edhe në këtë raport edhe fatkeqësisht edhe pasojat e atyre marrëdhënieve i kemi në jetën e përditshme”, ka përfunduar lideri i AAK-së.
