Institucionet e vendit po vazhdojnë edhe sot aksionin e tyre për të luftuar zhvillimin e veprimtarive në kundërshtim me ligjet që po bëjnë disa subjekte afariste në Prishtinë.
Sot organet e rendit nga policia e prokuroria së bashku me ata nga Administrata Tatimore e Kosovës dhe Inspektorati i Tregut, janë futur brenda biznesit që për veprimtari ka shitjen dhe servisimin e telefonave mobilë.
Bëhet fjalë për mobil shopin “FITA Service”, i cili dje sikur të kishte kuptuar aksionin e institucioneve edhe nuk ishte hapur fare për punë. Por, pas aksionit të djeshëm nga Njësia Rajonale për Hetimin e Krimeve Ekonomike dhe Korrupsionit dhe Inspektoratit të Tregut, ky biznes është bllombuar.
Kështu institucionet gjatë ditës së mërkurë për disa orë rresht kanë bërë kontrollim në mobil shopin “FITA Service”, nga i cili deri në momentin që po raportojmë janë konfiskuar rreth 60 telefona me vlerë të së paku 50 mijë eurove.
Ndërkohë që aksioni po vazhdon ende, KosovaNews nga burimet e saj brenda institucioneve të sigurisë mëson se konfiskimi është bërë pasi që telefonat nuk janë të mbuluar me dokumentacion dhe për rrjedhojë është e dyshuar prejardhje e tyre.
Kujtojmë se aksioni i madh në ‘Mobile shop’-e në Prishtinë nisi dje nga dhjetëra hetues policorë nga Krimet Ekonomike të Policisë së Kosovës dhe inspektorë nga MINT, me ç’rast janë kontrolluar 31 dyqane.
Ndërsa nga aksioni i djeshëm janë sekuestruar 118 telefona të mençur, tre tabletë, dhe 11 airpods.
Në njoftimet e djeshme zyrtare u tha nga hetimet e mëhershme dhe të gjeturat gjatë kontrollimeve të fundit është krijuar dyshimi se bizneset (pronarët e bizneseve të kontrolluara), dyshohet se kanë kryer veprat penale – shmangia nga pagesa e tarifave të detyrueshme doganore ose tarifave akcizore, – kontrabandimi i mallrave, dhe – shmangia nga tatimi.
