Kryeministri i vendit, Albin Kurti i është përgjigjur disa pyetjeve të deputetëve nga opozita.
Kurti në seancën e sotme të Kuvendit të Kosovës ka thënë se emisarët i kanë kërkuar atij që mos ta bëj publike draft statutin.
Ai po ashtu iu drejtua deputeteve opozitar duke i thënë që është në “hall me ta”.
“E kuptoj kërkesën e juaj që ta shihni draftin, por emisarët më thanë që mos t’ua tregoj draftin. Tash si thoni ‘a me koordinim, a pa koordinim’. Unë e kam nda me presidenten e shtetit. Ata kanë kërku që mos të publikojë draftin. Me bo me ua tregu draftin, i bien pa koordinim. Për besë jam në hall me ju”, ka thënë Kurti.
Kryeministri i vendit po ashtu tha se “Drafti i emisarëve është i marrëveshjeve 2013 dhe 2015, mirëpo ky draft është i pa krahasueshëm më i mirë se i atyre viteve.
“E kam pranuar draftin fizikisht, dhe elektronikisht. Ia kam dërguar vërejtjet për draft. Serbia nuk është shtet normal, e unë nuk dua ta normalizoj Serbinë por të normalizojë marrëdhëniet.
Unë raportoj para jush, e jo para ambasadorëve. Ata i kam thirrur në një raport njoftues e kanë marr shumë pak, nga ajo që është thënë këtu”, tha mes tjerash ai.
Paraprakisht kryeministri i Kosovës, Albin Kurti, tha para deputetëve të Kuvendit se draft-statuti për themelimin e Asociacionit të komunave me shumicë serbe, i prezantuar nga diplomatët ndërkombëtarë, ka qartësi sa i përket njohjes së Kosovës.
Sipas tij, kjo qartësi nuk paraqet “Zajednicën” (v.j. që në gjuhën serbe do të thotë Asociacion) të paraparë në marrëveshjet e vitit 2013 dhe 2015, sepse “asisoi do të ishte i padiskutueshëm”.
