Një studim i ri hungarez, i botuar në BMC Psychology ka nxjerrë në pah lidhjen mes adhurimit të të famshmëve dhe performancës më të ulët në testet njohëse.
Studimi u krye nëpërmjet një sondazhi me 1,763 të rritur që përfunduan një sërë detyrash, duke përfshirë një test fjalori dhe logjik. Të anketuarit më pas plotësuan një pyetësor të krijuar për të përcaktuar se sa të interesuar ishin ata për njerëzit e famshëm.
Pjesëmarrësve iu desh të përgjigjeshin me po ose jo për një sërë deklaratash, duke përfshirë: “Shpesh ndihem i detyruar të njoh zakonet personale të personazhit tim të preferuar” dhe “Jam i fiksuar pas detajeve rreth personazhit të famshëm tim të preferuar”.
Studiuesit zbuluan se ata që shënuan rezultate të larta në interesin për yjet gjithashtu performuan dobët në dy teste të aftësisë njohëse.
Megjithatë, ata pranuan se nuk mund të thonë nëse fiksimi me kulturën e të famshmëve ishte shkak apo pasojë e aftësive më të ulëta njohëse dhe hulumtimi nuk përcakton shkakun dhe efektin.
Sipas ekspertëve, “këto gjetje janë në përputhje me gjetjet e mëparshme për sjelljet e varësisë, të cilat sugjerojnë se fiksimet e tepërta mund të dëmtojnë funksionimin njohës për shkak të rritjes së përqendrimit dhe energjisë së investuar në sjelljen që dominon jetën e personit”.
“Studimet e ardhshme duhet të kërkojnë mbështetje të mëtejshme për hipotezën tonë se përpjekja njohëse e investuar për të vazhduar me thashethemet e një njeriu të famshëm mund të ndërhyjë në performancën e personit në detyrat që kërkojnë vëmendje dhe aftësi të tjera njohëse”, thanë studiuesit.
