20 kamionët e parë me ndihma kanë kaluar në Rripin e Gazës përmes vendkalimit kufitar Rafah mes Gazës dhe Egjiptit. Menjëherë më pas, vendkalimi është mbyllur edhe pse sekretari amerikan Blinken ka kërkuar që vendkalimi të mbetet i hapur. Sekretari i OKB-s, nga Samiti i Paqes në Egjipt ka dënuar dërgimin e ngadaltë të ndihmës për dy milionë palestinezët në Gazë.
Kamionët e parë me ndihma humanitare, që nga 7 tetori, kanë kaluar nga Egjipti në Gazë nëpërmjet vendkalimit kufitar Rafah. Njëri nga kamionët bartte arkivole. Kjo ndihmë, në terren do të shpërndahet nga personeli i Organizatës së Kombeve të Bashkuara. Këtë ndihmë që tashmë ka hyrë në Rripin e Gazës, OKB e ka quajtur “një pikë uji në oqean” duke e krahasuar me nevojën që duhet të dërgohet. Në këta kamionë ka ushqim, ujë dhe ilaçe, por jo edhe karburante.
Shtetet e Bashkuara e kanë përshëndetur lejimin e kamionëve me ndihma për të kaluar në Rripin e Gazës ndërsa sekretari amerikan Antony Blinken gjithashtu ka kërkuar nga të gjitha palët që ky vendkalim kufitar të mbetet i hapur për të mundësuar kalimin e ndihmës. Megjithatë, menjëherë pas kalimit të këtyre kamionëve, vendkalimi kufitar është mbyllur përsëri.
Ndërsa në Egjipt, presidenti Abdel Fattah El-Sissi është nikoqir i një samiti të quajtur i Paqes ku janë mbledhur liderët rajonal për të diskutuar përshkallëzimin e luftës mes Izraelit dhe Hamasit në Gazë.
Pjesëmarrës në këtë samit ishte edhe sekretari i OKB-s, Antonio Guteresh, i cili e ka dënuar dërgimin e ngadaltë të ndihmës në Gazë. Në njërën anë kam parë qindra kamionë të ngarkuar me ushqim dhe furnizime tjera, në anën tjetër në anën tjetër janë rreth 2 milionë njerëz pa ujë, ushqim, rrymë, karburante dhe ilaqe. Kamionët të ngarkuar plot në njërën anë, stomakët e zbrazët/bosh në anën tjetër, ka thënë Guterres.
Në mesin e pjesëmarrësve në samit ishte, përveç sekretarit të OKB-s, edhe presidenti i autoritetet palestinez Mahmud Abas, mbreti Abdullah i Jordanisë, sheiku Mohammed bin Zayed nga Emiratet e Bashkuara Arabe, mbreti i Bahrainit, sheiku i Katarit, princi i Kurorës i Kuvajtit, ministri turk i Punëve të Jashtme, kryeministri irakian, kryeministri i Spanjës, presidenti i Afrikës së Jugut, kryeministrja e Italisë, kryeministri grek, ministrja gjermane e Punëve të Jashtme, ministrja franceze e Punëve të Jashtme, presidenti i Këshillit Evropian.
