Në Prishtinë do të organizohet një marsh në mbështetje të Palestinës. Sipas një postimi të hapur në Facebook, marshi do të organizohet në qendër të Prishtinës, të shtunën më 21 tetor. Në thirrje të marshit është kërkuar që të marshohet në heshtje “pa bërtima e zhurmë, pa rënë pre e asnjë provokimi në përkrahje të Palestinës në përgjithësi, e në përkrahje të Gazës në veçanti, duke i nderuar viktimat civile të pafajshme dhe duke shprehur përkrahjen tonë për palestinezët e pafajshëm”.
“Prandaj nëse i thua vetes musliman, nëse i thua vetes shqiptar, nëse i thua vetes njeri dhe ke ndërgjegje njerëzore… Bëje zemrën guri dhe bashkohu me ne! Të dëshmojmë para Zotit dhe para botës se jemi në anën e të drejtës, në anën e të pafajshmëve, në anën e të vrarëve dhe të masakruarve mizorisht edhe nëse krejt bota është kundër”, thuhet në ftesën për marshim.
Marshi është organizuar nga i dënuari për pjesëmarrje në organizata terroriste, Albert Berisha. Berisha ishte dënuar me tre vjet e gjysmë për pjesëmarrjen në luftën në Siri. Me të shkuar më 2013 në Siri, Berisha pati kuptuar çfarë po ndodhte atje dhe kishte vendosur të arratisej e të kthehej menjëherë në Kosovë. Në Kosovë, ai u përballë me drejtësinë dhe u dënua me tre vjet e gjysmë burgim. Pasi doli nga burgu, Berisha themeloi një Institut për Siguri dhe Deradikalizim (INSID). Ai punon në hulumtimin e rasteve për ta parandaluar radikalizimin.
Në emisionin “60 Minuta” në KTV vitin e shkuar, Berisha pati thënë se ka imamë të cilët kanë nxitur shkuarjen në Siri të shumë të rinjve asokohe dhe kjo po vazhdon edhe sot. Sipas tij, këta imamë ndryshe flasin publikisht e ndryshe privatisht. Berisha pati pasur kritika edhe për shtetin, për të cilin thotë se dënoi vetëm viktima dhe jo nxitësit.
Në Lindje të Mesme dy javë më parë shpërtheu lufta pasi grupi militant palestinez Hamas sulmoi Izraelin. Si kundërpërgjigje, Izraeli nisi me sulme të ashpra ndaj Gazës. Që nga ajo kohë ka mijëra të vrarë në dy palët dhe shpërngulje masive të palestinezëve nga Gaza, në një kohë kur Izraeli në vazhdimësi po paralajmëron pushtim të shkallës së plotë.
