Presidenti turk, Rexhep Taip Erdogan, ka mbajtur një qëndrim të ashpër ndaj aksionit të Izraelit në Rripin e Gazës, duke theksuar se përgjigjja me raketa ndaj Hamasit ka devijuar në një masakër mbi civilët.
Në një takim të grupit parlamentar të partisë AK, Erdogan kritikoi bombardimin pa mëshirë të Gazës, duke thënë se lufta duhet të ketë një moral.
“Ne besojmë se lufta ka edhe një moral. Ne kundërshtojmë vrasjen e civilëve në territorin izraelit. Ne kurrë nuk e pranojmë vrasjen e të pafajshmëve në Gaza. Një konflikt i kryer duke i ndërprerë ujin, rrymën elektrike, hyrjet dhe daljet e një qyteti, shembjen e infrastrukturës së tij, prishjen e të gjitha objekteve të adhurimit, nga xhamitë te kishat dhe shkatërrimin e ndërtesave në të cilat jetojnë civilët me bomba, nuk është një luftë, por një masakër.” tha Rexhep Taip Erdogan – President i Truqisë
Erdogan këmbënguli se nëse sulmet në Gaza vijojnë me masakër mbi civilët, atëherë Izraeli do të vendoset në një vend të padëshiruar, duke u trajtuar nga ndërkombëtarët si një organizatë dhe jo shtet.
“Sulmet ndaj Gazës mund ta shtyjnë Izraelin në një pozicion të papritur në sytë e opinionit publik botëror. Vrasja e qëllimshme e civilëve dhe bllokimi i ilaçeve që dërgohen me ndihmat humanitare mund të jenë reflekse të një organizate, jo të një shteti. Izraeli nuk duhet të harrojë se nëse vepron si një organizatë dhe jo si një shtet, ai përfundimisht do të fillojë të trajtohet si një organizatë. Ne jemi të gatshëm të parandalojmë thellimin e konfliktit. Ftojmë palët të vetëpërmbahen.” tha presidentu turk Erdogan.
Ministria e Shëndetësisë e Palestinës tha se 1.055 njerëz janë vrarë dhe më shumë se 5.100 të tjerë janë plagosur nga bombardimet hakmarrëse të Izraelit në Rripin e Gazës.
Të hënën, Izraeli njoftoi rrethimin e plotë të Rripit të Gazës, duke thënë se nuk do të lejonte futjen e ushqimit dhe karburanteve.
Ushtria izraelite tha të mërkurën se numri i përgjithshëm i të vrarëve në Izrael ka arritur në 1.200 dhe se më shumë se 2.700 njerëz janë plagosur që nga sulmi befasues i militantëve të Hamasit, të cilët i thyen barrierat kufitare dhe u futën në jug të Izraelit të shtunën.
Forcat Izraelite njoftuan të mërkurën se e kanë rindërtuar barrierën përreth Gazës dhe se kanë dërguar trupa këmbësorie, artileri dhe mbi 300.000 rezervistë në afërsi të kufirit me të.
“Ata janë afër Rripit të Gazës duke u përgatitur ta ekzekutojnë misionin që u është dhënë nga Qeveria e Izraelit – dhe ky mision është për t’u siguruar se Hamasi në fund të kësaj lufte nuk do të ketë më ushtri me të cilën mund t’i kërcënojë apo vrasë civilët izraelit”, thanë Forcat Mbrojtëse të Izraelit të mërkurën.
