Mediumi prestigjioz “Politico” ka shkruar të enjten për samitin e liderëve evropianë që mbahet në Granada të Spanjës duke i përmbledhur në disa pika zhvillimet në disa shtete dhe ndikimin në samit, përfshirë edhe Kosovën.
Ndërsa, presidentët e Kosovës dhe të Serbisë të dy do të marrin pjesë, zyrtarët e Bashkimit Evropian dhe të Kosovës kanë thënë se Komuniteti Politik Evropian nuk është forumi i duhur për dialog, pasi diskutimet duhet të mbahen mes presidentit serb Aleksandër Vuçiq dhe kryeministrit të Kosovës, Albin Kurti, i cili nuk do të marrë pjesë, ka shkruar Politico.
Ndërkaq, ka shtuar më tej se Kosova në vend të tij po e dërgon presidenten Vjosa Osmanin e cila mban funksion kryesisht ceremonial.
Ky medium shkruan se Komuniteti Politik Evropian është në koma të thellë. Deri këtë javë, liderët e BE-së kishin shpresuar se mund të rindeznin bisedimet e paqes midis Ilham Aliyev të Azerbajxhanit dhe Nikol Pashinyan të Armenisë në takimin e sotëm në Spanjë. Por nisma dështoi dhe tani nuk ka asnjë rezultat për takimin e sotëm, thonë diplomatë dhe zyrtarë. Komuniteti Politik Evropian “po shpërbëhet”, ka thënë një zyrtar i lartë i BE-së.
Si problem të këtij forumi e paraqet se qëllimi i tij nuk u bë i qartë, nëse ishte për diskutim, si shtëpi për anëtarët aspirantë të BE-së apo forum për liderët evropianë që të merrnin vendime për të depërshkallëzuar tensione – në të tria këto synime komuniteti po dështon.
