Ministria e Shëndetësisë përmes një reagimi ka thënë se janë të sinjalizuar dhe të informuar se ka pretendime për mungesë të furnizimeve me barna e materiale shëndetësore për qytetarët në komunat në veri të vendit.
Këto, pretendime sipas ministrisë, janë të pabaza dhe tendencioze, dhe sipas tyre, një nga pretendimet lidhet edhe me pikat kufitare.
Ministria vlerëson se përveç pikave kufitare në Jarinjë dhe Bërnjak që qëndrojnë të mbyllura për arsye të sigurisë, pika tjetër kufitare në Merdare është e hapur.
“Bëjmë me dije se çdo kërkesë për donacione për Institucionet shëndetësore në komunat me shumicë serbe trajtohet nga komisioni i donacioneve dhe në asnjë rast nuk ka pasur vonesë të asnjë forme. Deri më tani asnjë kërkesë e tillë nuk është refuzuar. Të gjitha produktet që importohen nga Serbia në përputhje me Ligjin për pajisje dhe produkte medicinale edhe përkundër mbylljes së përkohshme të pikave kufitare edhe më herët dhe tani këto raste kanë bërë përjashtim”, thuhet në reagimin e Ministrisë së Shëndetësisë.
Sipas ministrisë, çdo deklarim tjetër që mund të jepet apo është dhënë tashmë nuk qëndron.
“Gjithashtu për çdo kërkesë apo nevoje të këtyre institucioneve shëndetësore, Ministria e Shëndetësisë ka qenë dhe vijon të jetë e gatshme në çdo kohë për furnizim dhe çfarëdo mbështetje tjetër që mund të kërkohet”, thuhet mes tjerash në reagim.
