Kryeministri i Shqipërisë, Edi Rama, ka thënë se KFOR-i është mision i NATO-s dhe jo ndonjë forcë pushtuese e Serbisë, duke shtuar se reagimet për deklaratën e tij se “KFOR-i duhet ta marrë kontrollin e veriut” janë të dhimbshme dhe qesharake.
Deklarata e Ramës nxiti reagime të mëdha në opinionin e Kosovës. Bekim Kupina, këshilltar për Media i Presidentes Vjosa Osmani tha se ajo në çdo bisedë dhe takim me partnerët dhe aleatët e ka sqaruar se mandati i KFOR-it, është vetëm si reagues i tretë dhe në mbështetje të Policisë së Kosovës si reagues i parë dhe institucioni kyç për sundimin e ligjit dhe sigurinë në secilën pjesë të territorit të saj.
Kupina thotë se Institucionet e Kosovës kanë kërkuar mbështetje nga NATO-ja, që patrullimet në zonën kufitare t’i përfshijnë edhe ushtarët e NATO-s, përkrah policëve të Kosovës në mënyrë që të parandalohet hyrja e grupeve terroriste dhe sulmet nga Serbia.
Ai tutje tha se Policia e Kosovës ka mandat të plotë në të gjithë territorin e Kosovës, ndërsa me NATO-n, ka bashkëveprim dhe koordinim të ngushtë, siç e dëshmon edhe reagimi e operacioni policor gjatë sulmit terrorist në Banjskë më 24 shtator 2023.
:Pra, nuk bëhet fjalë për marrjen e kompetencave sovrane të institucioneve të sigurisë së Kosovës nga KFOR-i, por për mbështetjen e institucioneve të Kosovës në ndalimin e agresionit nga Serbia” përfundoi Kupina.
