Në Shtetet e Bashkuara të Amerikës është mbajtur debati i dytë kandidatëve republikanë që i kanë hyrë garës për të fituar nominimin e partisë për president të vitit të ardhshëm. Ish-presidenti amerikan Donald Trump nuk ka marrë pjesë, ashtu siç edhe ka paralajmëruar.
Në këtë debat kanë marrë pjesë guvernatori i Floridas dhe kandidati i dytë më popullor i Republikanëve, Ron DeSantis, ndërmarrësi Vivek Ramasëamy, ish-ambasadorja e SHBA-s në OKB, Nikki Haley, ish-guvernatori i Neë Jerseyt, Chris Christie, ish zv/presidenti, Mike Pence, senatori i Karolinës së Jugut, Tim Scott, dhe guvernatori i Dakotës së Veriut, Doug Burgum.
Fituesi republikan në zgjedhjet e brendshme do të garojë vitin e ardhshëm kundër presidentit të tanishëm amerikan, demokratit Joe Biden, i cili, me gjasë, do të jetë i përzgjedhuri i demokratëve.
Debati konstruktiv dhe i sjellshëm e ka karakterizuar pjesën e parë, por që vazhdimisht është ashpërsuar,duke bërë që tre moderatorët e këtij debati të humbin kontrollin disa herë.
Ish-presidenti Donald Trump, në shumicën e sondazheve, i prin garës republikane me rreth 40 pikë ndërsa ka kohë që ka paralajmëruar se nuk do të marrë pjesë nëpër debate.
Në një sondazh të televizionit komercial, CBS, realizuar më herët këtë muaj, ish-presidenti Trump prin me një pikë kundrejt presidentit Joe Biden në një ripërballje eventuale vitin e ardhshëm.
Republikanët do të fillojnë të votojnë për kandidatin e tyre në garën shtet-për-shtet në Janar, ndërsa shteti i parë ku do të nisin votimet është Ioëa. Kandidati fitues, zyrtarisht do të shpallet në Konventën e Partisë, që do të mbahet në Milëaukee, në korrik.
