Kryetari i Këshillit Atlantik të Austrisë, Gunther Fehlinger, ka propozuar që Kosova dhe BE-ja ta shpallin Listën Srpska organizatë terroriste pas publikimit të pamjeve nga ministri i Brendshëm, Xhelal Sveçla, i cili tha se aty shihet që pjesë e grupit terrorist që sulmoi Policinë e Kosovës ishte edhe nënkryetari i Listës Srpska, Milan Radojiçiq.
“I bëj thirrje BE-së dhe Kosovës që të shpallin Listën Srpska organizatë terroriste”, ka shkruar ai në X.
Disa pamje nga manastiri i Banjskës ku shkuan terroristët pasi sulmuan Policinë e Kosovës ku mbet i vrarë polici Afrim Bunjaku, i ka publikuar Sveçla, duke fokusuar njërin prej tyre, për të cilin tha se është Radojiçiq.
“Ky në pamjet më poshtë është Milan Radojçiq, nënkryetar i Listës Serbe, po ashtu pjesë edhe e Listës së Zezë të ShBA-së dhe Mbretërisë së Bashkuar”, ka shkruar Sveçla.
Ai shtoi se kryekrimineli Radojçiq ka qenë udhëheqës i këtij grupi terrorist dhe i sulmit ku mbeti i vrarë polici Afrim Bunjaku.
“Kjo është edhe një dëshmi tjetër mbi veprimtarinë e tij terroriste ndaj Republikës së Kosovës. Nënkryetari i Listës Serbe është prijës i sulmit terrorist dhe grupit të terroristëve. Harta e sulmit terrorist po qartësohet çdo ditë: Aleksandër Vuçiq përmes Listës Serbe, dhe këta përmes nënkryetarit të tyre Radojçiq, kanë ndërmarrë veprimin terrorist kundër rendit juridik dhe kushtetues të Republikës së Kosovës duke tentuar të destabilizojnë Republikën tonë. Pra, LS e sheh pjesëmarrjen e saj në Kosovë vetëm në mënyrë terroriste. Ata dështuan. Ndërkohë, ditët e zisë të shpallura sot nga Serbia dhe Lista Serbe janë tashmë vulosja e autorësisë së këtij organizimi”.
I call EU and Kosovo 🇽🇰 to declare @srpskalista a terrorist organization @ManfredWeber @RobertaMetsola @guyverhofstadt @gahler_michael https://t.co/xL3xq3or3V
— Gunther Fehlinger (@GunterFehlinger) September 26, 2023
