Me vendim të Gjykatës njësitet e Policisë së Kosovës kanë kryer gjatë ditës së sotme një kontroll në fshatin Cermjan-Gjakovë, me ç’rast kanë gjetur e konfiskuar një pushkë mitraloz dhe një pushkë automatike AK47 me dy karikator.
Policia e Kosovës njofton se sot paradite rreth orës 11:30, Sektori Rajonal për Hetime në Drejtorinë Rajonale në Gjakovë kishte pranuar informacion se i dyshuar B.Sh. i lindur në vitin 1965, shtetas i Republikës së Kosovës, në vendbanimin e tij posedonte armë në mënyrë të paautorizuar.
“Pas një aktiviteti operativ dhe hetimor nga Sektori Rajonal për Hetime është arritur që i dyshuari të arrestohet mbi dyshimin e arsyeshëm për mbajtje në pronësi, kontroll ose posedim të paautorizuar të armëve me urdhër kontrollin e lëshuar nga Gjykata. Urdhër kontrolli është realizuar në vendbanimin e të dyshuarit në fshatin Cermjan-Gjakovë, me ç‘rast është sekuestruar një pushkë mitraloz dhe një pushkë automatike AK47 me dy karikator”, thuhet nga Policia.
Bëhet e ditur se me vendim të Prokurorit të Shtetit pas përfundimit të procedurave policore, personi i arrestuar është liruar, ndërsa rasti vazhdon me hetime në procedurë të rregullt./KosovaNews/
