Ministri i Shëndetësisë, Arben Vitia, ka thënë se kanë ardhur mjekë shtesë në Spitalin e përgjithshëm të Mitrovicës.
Vitia ka thënë se dy ekipe kanë ardhur tashmë, ndërsa janë në gatishmëri edhe dy ekipe tjera në QKUK.
Po ashtu ka thënë se është në gatishmëri totale edhe Spitali i Vushtrrisë, në rast se do të jetë e nevojshme.
Është ngritur gatishmëria e institucioneve shëndetësore pas zhvillimeve të fundit në veri, ku si pasojë e një sulmi në afërsi të fshatit Banjskë në Zveçan ka mbetur i vdekur rreshteri policor Afrim Bunjaku, ndërsa janë lënduar dy policë. Po ashtu ka mbetur i vdekur edhe një sulmues.
“MSH-ja menjëherë është vënë në mobizilim, që të organizohen e shtohen gjitha kapacitete e mundshme, sidomos në Spital të Mitrovicës, por me mobilizim të veçantë në Spital të Vushtrrisë edhe QKUK. Tashmë kanë arritur dy ekipe të profesionalizuara në këtë spital me dy autoambulanca, nëse ka nevojë të ju vijmë në ndihmë kolegëve në këtë spital. Lutemi e shpresojmë që sa më shpejt të mbarojë kjo situatë e kjo gjendje. Përgëzojmë Policinë për krejt punën e angazhimin, e luftën që po bën kundër grupeve kriminale si ky sot. Ne si MSH e staf shëndetësor, të përgatitemi e të bëjmë maksimumin që në rast nevoje të ofrojmë shërbime shëndetësore për çdo polic të lënduar apo çdo qytetar pa dallim, të kenë shërbime sa më të shpejta, në situatë të tilla koha është flori”, ka thënë Vitia.
