Presidenti ukrainas Volodymyr Zelensky ka njoftuar se Ukraina do të nisë prodhimin e përbashkët të armëve me SHBA-në.
Masa do të lejojë Kievin të fillojë prodhimin e sistemeve të mbrojtjes ajrore si pjesë e një marrëveshjeje afatgjatë, raporton Sky News.
Prodhimi i tyre do të krijojë vende pune dhe një bazë të re industriale në Ukrainë.
Njoftimi u bë i ditur në faqen presidenciale kur Zelensky përfundoi një vizitë në SHBA.
“Ishte një vizitë shumë e rëndësishme në Washington, rezultate shumë të rëndësishme”, tha Zelensky.
“Dhe një marrëveshje afatgjatë – ne do të punojmë së bashku në mënyrë që Ukraina të prodhojë armët e nevojshme së bashku me Shtetet e Bashkuara. Bashkë-prodhimi në [sektorin] e mbrojtjes me Shtetet e Bashkuara është një gjë historike”.
Ukraina ka rritur përpjekjet e saj për të rritur prodhimin vendas të armëve sa më shumë që të jetë e mundur.
Ministria për Industritë Strategjike, e cila mbikëqyr prodhimin e armëve në Ukrainë, ka nënshkruar marrëveshje bashkëpunimi.
“Ne po përgatitemi të krijojmë një ekosistem të ri mbrojtës me Shtetet e Bashkuara për të prodhuar armë për të forcuar lirinë e mëtejshme dhe për të mbrojtur jetën së bashku”, tha Zelensky pa dhënë më shumë detaje.
