Futbollistët e Kosovës janë angazhuar, por janë larguar duarthatë nga “Arena Nationala” në Bukuresht të Rumanisë. Të martën mbrëma, Kosova pësoi 2:0 nga Rumania në ndeshjen kualifikuese për “Euro 2024”.
Ndeshja ishte me shumë zhvillime, ndërsa përfundoi me festë të përfaqësueses vendase.
Ndeshja u ndërpre në minutën e 18-të kur një grup huliganësh rumunë në stadium shfaqi panon “Kosova është Serbi”. Ndeshja më pas nuk ka vazhduar për plot 50 minuta.
Por ngjarjet e pazakonta nuk u ndalën. Në minutën e 42-të, Vedat Muriqi u përjashtua pas kartonit të dytë të verdhë. Të dy kartonat i mori për goditje me bërryl.
Në pjesën e parë “Dardanët” rezistuan, duke mbajtur rezultatin 0:0. Por mungesa e një lojtari u vërejt në pjesën e dytë.
Rumunët ishin vazhdimisht në sulm dhe në fund i realizuan dy gola. Fillimisht Rumania humbi penallti në minutën e 59-të. Penalltinë e shkaktoi Amir Rrahmani pas gabimit të Bernard Berishës. Nga pika e bardhë gjuajti Nicolae Stanciu, por Aro Muriq intervenoi me sukses.
Muriq megjithatë u mposht në minutën e 83-të. Për 1:0 shënoi pikërisht Stanciu. Golin e dytë për vendasit e shënoi Valentin Mihaila në minutën e 93-të. Më parë rast të mirë lëshoi Florian Loshaj, goditjen e të cilit e ndali portieri rumun.
Kosova mbetet e parafundit me vetëm katër pikë. Është thuajse pa gjasa për kualifikim. Rumania është e dyta me 12 pikë.
Rumania shënon edhe golin e dytë
Rumani ka shënuar edhe golin e dytë ndaj Kosovës me Mihailan.
Pëson gol Kosova
Rumania ka kaluar në epërsi ndaj Kosovës. Në minutën e 83-të për 1:0 shënoi Stanciu.
Debutojnë Albion Rrahmani e Ismajl Beka
Te Kosova janë aktivizuar Albion Rrahmani e Ismajl Beka. Për të dy është debutim me përfaqësuesen A. Rezultati i ndeshjes Rumani – Kosovë vazhdon të mbetet 0:0.
Muriq ndal penalltinë
Aro Muriq ka shpëtuar Kosovën. Ai ndali goditjen nga pika e bardhë.
Rezultati mbetet 0:0.
Penalltinë e shkaktoi Amir Rrahmani pas gabimit të Bernard Berishës.
Nis pjesa e dytë
Ka nisur pjesa e dytë mes Rumanisë dhe Kosovës.
Rezultati është i barabartë 0:0. Kosova po luan me 10 lojtarë pas ndëshkimit me të kuq të Vedat Muriqit.
Nuk ka gola në pjesën e parë
Nuk janë shënuar gola në pjesën e parë të ndeshjes Rumani – Kosovë.
Kosovën e pret një pjesë e dytë shumë e vështirë. Do të luaj ne një lojtar më pak në fushë pas përjashtimit të Vedat Muriqit.
Goditje e rëndë, përjashtohet Muriqi
Vedat Muriqi është përjashtuar në ndeshjen ndaj Rumanisë. Në minutën e 42-të sulmuesi është përjashtuar pas kartonit të dytë të verdhë. Edhe kartonin e dytë e mori për goditje me bërryl.
Muriqi me rast të artë
Kosova i është afruar golit ndaj Rumanisë. Në minutën e 29-të, Vedat Muriqi rrezikoi, por topi u largua nga afërsia e portës.
Tensione mes lojtarëve
Ka tensione në fushën e stadiumit në Bukuresht. Kapiteni Amir Rrahmani ka pasur përplasje me lojtarët rumunë pas një ndërhyrje.
Merret vendimi, rifillon ndeshja Rumani – Kosovë
Ndeshja mes Rumanisë dhe Kosovës po vazhdon.
Futbollistët tashmë janë kthyer në fushë.
Është tërhequr vërejtje se nëse ka sjellje tjera diskriminuese ndeshja do të ndërpritet plotësisht
Po pritet vendimi për ndeshje
Është duke u pritur vendimi për ndeshjen Rumania – Kosova.
Ka gjysmë ore që ndeshja është ndërprerë. Tashmë po zhvillohen bisedime të zyrtarëve të ndeshjes me përfaqësuesit e dy federatave.
Zyrtarisht ndeshja është suspenduar
Zyrtarisht ndeshja mes Rumanisë dhe Kosovës është suspenduar. Tani pritet vendimi i UEFA-s nëse ndeshja do të vazhdojë.
Ndërpritet ndeshja në Bukuresht
Është ndërprerë ndeshja mes Rumanisë dhe Kosovës. Huliganët rumunë kanë shpalosur pano anti-Kosovë.
Kapiteni i Rumanisë ka shkuar që të flas me huliganët rumunë. Ata kanë paralajmëruar veprime anti-Kosovë në ndeshje.
Nis ndeshja Rumania – Kosova
Ka nisur ndeshja mes Rumanisë dhe Kosovës, e cila po zhvillohet në Bukuresht.
Ndeshja është e vlefshme për kualifikimet e Euro 2024.
