Kreu i shtetit, Albin Kurti ka thënë se nuk mendon që ka arsye të flitet mbi mundësinë që qytetarëve të Kosovës të mos u lejohet lëvizja e lirë nga 1 janari 2024.
Në një intervistë për mediumin estonez “Delfi”, Kurti tha se Serbia e pranoi marrëveshjen pa e nënshkruar
“Unë kam thënë se do ta nënshkruaj marrëveshjen Kosovë-Serbi, por Serbia tha se do ta pranojë por pa e nënshkruar. Prandaj, unë nuk mendoj se ka arsye të flitet se si ka mundësi që regjimi i vizave për Kosovën të mos hiqet më 1 janar. Ne kemi bërë gjithçka të mundshme në lidhje me Serbin”, ka thënë Kurti.
Kryeministri ka bërë një numër komentesh qortuese ndaj “qasjes së butë” të Perëndimit ndaj Serbisë, ku madje ka dhënë edhe disa “ide” se si duhet të rrotllojnë këtë qasje.
Për atë se Serbia nuk e zbaton Marrëveshjen e Ohrit, Kurti tha se Serbia duhet të kërcënohet me sanksione; dhe iu dha disa sugjerime BE-së dhe ShBA-së se çka duhet të bëjnë.
“Për shembull, liderët e BE-së duhet t’i thonë Beogradit se nëse nuk e zbatoni Marrëveshjen me Kosovën, do t’ua kthejmë regjimin e vizave. Do të ishin të gatshëm menjëherë ta zbatojnë marrëveshjen, sepse nuk do të guxonin të humbisnin lëvizjen e lirë pa viza”, ka thënë Kurti.
Ndërkaq, edhe më tej ai i sugjeron bashkërisht ShBA-së dhe BE-së se duhet “t’ua theksojnë Serbisë” mbështetjen financiare dhe materiale që ata e marrin prej tyre.
“Duhet t’i thonë që mbështetja ndaj Serbisë nga perëndimi demokratik nuk duhet të merren si e mirëqenë”, ka thënë Albin Kurti.
“Po, mendoj se ndaj Serbnisë duhet marrë masa strikte për investimet e huaja. Nëse do të kërcënoheshin me tërheqje, Serbia do të sillej menjëherë në mënyrë të disiplinuar dhe do ta zbatonte marrëveshjen tonë”, ka thënë Kurti.
