Qeveria e Kosovës me punën dhe angazhimin e saj ka arritur të bindë Asamblenë e Përgjithshme të Komitetit Ndërkombëtar të Lojërave Mesdhetare që Kosova t’i organizojë Lojërat Mesdhetare në vitin 2030, por kjo e arritur historike, si duket, nuk i ka pëlqyer edhe kryetarit të Partisë Demokratike të Kosovës, Memli Krasniqi, i cili nëpërmjet një postimi në profilin e tij në Facebook mundohet të mohojë rolin e shtetit të Kosovës në këtë ngjarje historike për sportistët dhe shtetin në përgjithësi.
Krasniqit nuk i ka pëlqyer fakti se kandidatura e Kosovës është prezantuar nga kryeministri Albin Kurti, kryetari i Komitetit Olimpik të Kosovës, Ismet Krasniqi, dhe sekretari i përgjithshëm i KOK-ut, Besim Aliti. Dhe të pranishëm kanë qenë edhe ministri i Kulturës, Rinisë dhe Sportit, Hajrulla Çeku, kryetari i Prishtinës, Përparim Rama, dhe zyrtarë të tjerë të lartë qeveritarë.
Në reagimin e tij, ai i ka përgëzuar Komitetin Olimpik, Komunën e Prishtinës dhe Drejtorinë e Sportit, por nuk i ka përmendur askund shtetin e Kosovës dhe institucionet e tij.
“Prishtina organizatore e Lojërave Mesdhetare 2030!
Përgëzime Komitetit Olimpik të Kosovës, Komunës së Prishtinës dhe Drejtorisë për Sport, si dhe të gjithë atyre që janë angazhuar për të arritur këtë sukses.
26 shtete, 19 nga Evropa, 5 nga Afrika dhe 2 nga Azia do të zbarkojnë në Prishtinë për t’i dhënë shkëlqim e frymë sportive Kryeqytetit tonë.
Mirëardhshi në Kosovë. Urime të gjithëve!:, ka shkruar Krasniqi.
Krasniqi ka thënë se në Lojëra Mesdhetare do të marrin pjesë sportistë nga 26 shtete, por po harron se Qeveria e Kosovës pritet të investojë mbi 250 milionë euro për organizimin e kësaj ngjarje të madhe sportive. Falë këtij triumfi të Shtetit të Kosovës, mbi 3000 sportistë priten të vijnë në Prishtinë pas shtatë vjetësh. Kjo ngjarje e madhe për Kosovën, gjatë ditës është përshendetur edhe nga ambasadori i Gjermanisë në Kosovë dhe, presidentja Osmani dhe liderë të tjerë opozitar, të cilët e kanë quajtur arritje të madhe për Kosovën.
