Betim Fazliji ka disa vjet që është prej lojtarëve të rëndësishëm të përfaqësueses së Kosovës. Fazliji është i rritur në Zvicër dhe është zhvilluar në futbollin e këtij vendi. 24-vjeçari ka luajtur për U20 të Zvicrës dhe prej vitit 2020 është te Kosova. Tashmë i ka 20 paraqitje.
Mesfushori defanziv ka folur për televizionin zviceran, SRF. SRF ka shkruar se vendimi i Fazlijit për të luajtur për Kosovën ishte i llojit “koka para zemrës”. Ai ka dashur të luajë për një ekip përfaqësues, ndërsa te Zvicra kishte konkurrencë të madhe.
“Ju vetëm duhet të shikoni emrat e lojtarëve. Xhaka, Zakaria, Freuler. Janë lojtarë të nivelit botëror”, ka thënë Fazliji.
Ai nuk është pishman për vendimin që të luajë për Kosovën. Thotë se vendimi nuk është anti-Zvicër.
“Unë i dua njëjtë Kosovën e Zvicrën. Dhe isha i dëshpëruar kur në mediat zvicerane kam lexuar se ishte vendim kundër Zvicrës”, ka thënë Fazliji.
Ai thotë se ish-selektori i Kosovës, Bernard Challandes, ka punuar shumë për ta afruar në përfaqësuese.
Kosova e Zvicra luajnë të shtunën në Prishtinë. Është ndeshje kualifikuese për “Euro 2024”. Në mars të vitit të kaluar një miqësore mes dy përfaqësueseve në Zuerich kishte përfunduar 1:1.
“Do të jetë një ndeshje emocionale për shumë lojtarë. Në të dy përfaqësueset ka lojtarë që kanë rrënjë në vendin tjetër. Do të jetë ‘ndeshje miqësore’, por edhe ndeshje për pikë të rëndësishme”, thotë Fazliji.
Kosova ka nisur zbehtë kampanjën kualifikuese dhe Fazliji e di këtë.
“Kur shikoj në aspektin individual lojtarët e ekipit tonë, nuk mund të kuptoj se si kemi barazuar me Andorrën dhe kemi humbur nga Bjellorusia. Mendoj se kualiteti është që të luhet për pozitat e para në grup”.
Për Fazlijin ndeshja e së shtunës do të jetë e veçantë. Ai është i lumtur për sukseset e Zvicrës, ndërsa ka uruar që sukseset e saj të jenë edhe më të mëdha.
Pas periudhës jo të suksesshme në Gjermani te St. Pauli, Fazliji është kthyer te St. Galleni në Zvicër, ku po shkëlqen sërish. Shpresohet që ai të shfaqë formë të lartë edhe të shtunën ndaj përfaqësueses së vendit ku është rritur.
