Policia e Kosovës njofton se po hetohet rasti i djegies së Muzeut të Muzikës në Gjakovë.
Në raportin 24 orësh të Policisë, thuhet se rasti ka ndodhur të mërkurën, rreth orës 18:27 dhe është iniciuar si “Zjarrvënie”.
“ZJARRVËNIE – Gjakovë 30.08.2023-18:27. Është raportuar per nje objekt qe është kapluar nga zjarri. Në vendin e ngjarjes kanë dal njësitë përkatëse policore si dhe zjarrfikësit të cilët e kanë lokalizuar zjarrin. Eshte njoftuar prokurori kujdestar, rasti ne procedure hetimore.”, thuhet në njoftim.
Ndërsa, në reagimin e Komunës së Gjakovës, thuhej se lajmi për djegien e këtij objekti, është lajm i keq për Gjakovën dhe se presin hetimet për të kuptuar se çka e shkaktoi zjarrin.
Reagimi i Komunës:
“Ajo çfarë ka ndodhur sonte me objektin e Tabhanës, është një lajm i keq për Gjakovën, lajm i cili na ka shokuar e indinjuar të gjithëve.
E presim hetimin e policisë për ta kuptuar shkakun e zjarrit.
Përveç keqardhjes, në këtë moment është i rëndësishëm fakti se në objektin e djegur nuk ka qenë asnjë artefakt i muzeut të muzikës. Pra, të gjitha elementet që kanë vlera historike e artistike kanë shpëtuar.
Ajo çfarë mund të themi tjetër është informata e sigurtë se objekti i Tabhanës do të ri-ndërtohet vitin tjetër nga buxheti komunal“.
