Rusia ka informuar autoritetin e hetimit të avionëve të Brazilit se nuk do të hetojë sipas rregullave ndërkombëtare rrëzimin e avionit brazilian “Embraer”, ku vdiq shefi i Wagnerit, Yevgeny Prigozhin, ka bërë të ditur agjencia braziliane për Reuters të mërkurën.
Prigozhini, dy togerë kryesorë të grupit të tij dhe katër truproja kanë qenë në mesin e 10 personave që vdiqën kur “Embraer Legacy 600” u rrëzua në veri të Moskës javën e kaluar.
Ai vdiq dy muaj pas organizimit të rebelimit kundër institucionit të mbrojtjes ruse që përbënte sfidën më të madhe për qeverisjen e Presidentit Vladimir Putin që kur ai erdhi në pushtet në 1999.
Qendra e Brazilit për Kërkimin dhe Parandalimin e Aksidenteve Aeronautike (CENIPA), në interes të përmirësimit të sigurisë së aviacionit, ka thënë se do t’i bashkohej një hetimi të udhëhequr nga Rusia nëse do të ftohej dhe hetimi do të mbahej sipas rregullave ndërkombëtare.
Autoriteti i aviacionit i Rusisë nuk ishte i detyruar t’i thoshte po CENIPA-s, por disa ish-hetues thanë se duhej, pasi SHBA dhe qeveritë e tjera perëndimore dyshojnë se Kremlini qëndron pas rrëzimit të aeroplanit.
