Në një deklaratë të përbashkët, përfaqësuesi Special i Bashkimit Evropian për Dialogun Kosovë – Serbi, Miroslav Lajcak, shefi i Zyrës së Bashkimit Evropian në Kosovë, Tomas Szunyog dhe shefi i Misionit të EULEX-it, Giovanni Pietro Barbano, kanë bërë një thirrje për përparim të dukshëm në zbulimin e fatit të personave të zhdukur në Kosovë.
Ata kanë rikujtuar numrin prej 1 mijë e 616 personave të zhdukur me forcë në Kosovë dhe kanë theksuar të drejtën e plotë të familjeve të tyre për të ditur të vërtetën rreth fatit të të dashurve të tyre.
Lajçka ka përmendur edhe marrëveshjen e vitit 2023, të quajtur “Deklarata e Përbashkët për Personat e Zhdukur,” e nënshkruar kryeministri i Kosovës, Albin Kurti dhe nga presidenti serb, Aleksandër Vuçiq.
“Kosova dhe Serbia kanë shumë punë për të bërë për të siguruar zbatimin e plotë të zotimeve përkatëse në fushën e personave të zhdukur dhe për të rritur bashkëpunimin në identifikimin e vendeve të varrimit dhe kryerjen e gërmimeve”, ka deklaruar Lajcak.
Në këtë kontekst, deklarata, sipas tij, po ashtu thekson rëndësinë e punës së Komitetit Ndërkombëtar të Kryqit të Kuq (KNKK) për lehtësimin e bashkëpunimit midis palëve në çështjen e personave të zhdukur. Për ta ndihmuar këtë proces, është parashikuar krijimi i një Komisioni të Përbashkët, i kryesuar nga Bashkimi Evropian dhe i vëzhguar nga KNKK-ja.
Shefi i Zyrës së BE-së në Kosovë, Tomas Szunyog, ka theksuar ndihmën e BE-së për familjet që presin të mësojnë fatin e të dashurve të tyre.
Ai ka theksuar rolin e një projekti të financuar nga BE-ja, i zbatuar nga Fondi për të Drejtën Humanitare në Kosovë dhe Kosovo 2.0, që ka çuar në publikimin e një raporti të qasshëm në lidhje me sfidat e gjetjes së personave të zhdukur.
Po ashtu, sipas tij, BE-ja ka ofruar trajnime dhe pajisje për Institutin e Mjekësisë Ligjore të Kosovës për të ndihmuar në ndriçimin e fatit të personave të zhdukur.
Shefi i Misionit të EULEX-it, Giovanni Pietro Barbano, ka bërë të ditur se misioni ka kryer 746 operacione terreni për gjetjen e personave të zhdukur, duke përfshirë 200 zhvarrime.
Kjo, sipas tij, ka çuar në identifikimin e eshtrave të 492 individëve, duke përfshirë 339 persona të zhdukur.
“Që nga fillimi i mandatit të EULEX-it deri më sot, EULEX-i ka kryer 746 operacione terreni për gjetjen e personave të zhdukur, duke përfshirë 200 zhvarrime. Eshtrat e 492 individëve janë identifikuar, duke ku përfshihen 339 persona të zhdukur”, ka deklaruar ai.
Barbano ka shprehur përkushtimin e EULEX-it për të vazhduar këtë punë dhe për të ofruar përgjigje familjarëve të personave të zhdukur.
