Kapiteni i Manchester Cityt, Kevin De Bruyne, ka hedhur një aluzion të madh për transferimin e sulmuesit të Paris Saint-Germain, Kylian Mbappe.
De Bruyne u pyet për pikëpamjen e tij se ku do të luajë Mbappe këtë sezon dhe në vijim, si pjesë e një vështrimi drejt fituesit të Topit të Artë 2023.
Reprezentuesi belg konfirmoi se shoku i skuadrës Erling Haaland është zgjedhja e tij për çmimin individual pas një sezoni të parë të bujshëm në Etihad.
Si pjesë e pikës më të gjerë në betejat e ardhshme për Topin e Artë, De Bruyne beson se “Haaland vs Mbappe” do të jetë gara kyçe, nëse ky i fundit bashkohet me Real Madridin.
“Nuk e di se ku do të luajë Mbappe këtë sezon. Mendoj se është më e vështirë për Mbappe të fitojë një Top të Artë në PSG. Ka zëra se ai mund të shkojë te Real Madrid, mbase kjo do ta vendoste atë në vend të parë, përpara Erling Haaland”, ka thënë De Bruyne për Sky Sports.
Mbappe është lidhur shumë me një transferim të lirë te Real Madrid në vitin 2024, pasi refuzoi një zgjatje të kontratës për të qëndruar në Paris Saint-Germain.
Marrëveshja e tij aktuale me PSG-në skadon në fund të sezonit 2023/24, dhe pavarësisht optimizmit të ripërtërirë për një rinovim të mundshëm në Paris, ai duket i vendosur t’i bashkohet Los Blancos.
