Ka përfunduar seanca dëgjimore për masën e paraburgimit ndaj tre të arrestuarëve të djeshëm, dy zyrtarëve të MINT-it, Hafiz Gara dhe Irfan Lipovica dhe biznesmenit, Ridvan Muharremit.
Avokatët e Irfan Lipovica kanë thënë se klienti i tyre është i pafajshëm dhe se klienti i tij nuk e ka kryer veprën penale për të cilën është arrestuar.
“Ka përfunduar seanca dëgjimore, Prokuroria e bëri kërkesën për caktim të paraburgimit. Mbi bazën që i ka kërkesë Kodi i Procedurës Penale. Sipas mbrojtjes, shikimit të provave e materialeve sipas ligjit, pas analizimit, pas analizimit të kërkesës, nuk ka kushte për caktim të paraburgimit, madje as për dyshimin e bazuar, e as nivelin e dyshimit të arsyeshëm. Drejtësia nuk bëhet tek portalet dhe as nuk bëhet nëpër studio televizive. Bëhet me njerëz që kryejnë shkollë e kanë përvojë të madhe. Këta 3 persona që po e presin vendimin janë të pafajshëm”, ka deklaruar ai.
Ai thekson se të gjitha veprimet e tij janë në përputhje me ligjin.
“Seancë maratonike” e kanë cilësuar avokatët pasi e njëjta ka nisur rreth orës 11:00.
Tashmë, ata janë në pritje të vendimit të gjykatës.
Tutje, avokati i tij Osmani ka theksuar se mbetet në duar të Prokurorisë të sigurojë prova, pavarësisht natyës së tyre.
Gjatë mëngjesit të së premtes, pas një muaji të përgjimeve që u etiketuan si “afera e vajit dhe e grurit”, Policia e Kosovës kreu bastisje në Ministrinë e Industrisë, Ndërmarrësisë dhe Tregtisë, dhe te pronat e biznesmenit Ridvan Muharremi, nën dyshime për keqpërdorime të rezervave shtetërore.
Fillimisht, bastisja u krye te banesa e Ridvan Muharremit dhe te një lokal i tij, ku pastaj i njëjti edhe u shoqërua në polici. Kurse në MINT, u arrestuan dy zyrtarë, Hafiz Gara dhe Irfan Lipovica.
Bastisja e pronave të Muharremit nisi në orën 6:00 të mëngjesit, për të vazhduar më pas në bastisjen e ambienteve të MINT-it në orën 8:00.
Në polici janë shoqëruar drejtori i Departamentit për Rezervat Shtetërore të Mallrave, Hafiz Gara, dhe drejtori i Departamentit për Integrim Evropian dhe Koordinim të Politikave, ish-sekretari Irfan Lipovica.
Gara është shoqëruar në polici nga ambientet e MINT-it.
Disa zyrtarë policorë së bashku më disa dokumente që janë marrë brenda zyrave, janë larguar nga Ministria e Tregtisë dhe Industrisë.
Kjo ministri dyshohet se u bastis për shkak të dyshimeve për keqpërdorime të rezervave shtetërore, respektivisht të vajit dhe të grurit.
