Buxheti i planifikuar për vitin 2024 për Komunën e Malishevës, është rreth 20 milionë euro, ndërsa për investime kapitale janë të planifikuara 6.2 milionë euro.
Me qëllim të hartimit të projekt buxhetit, sot janë organizuar katër dëgjime buxhetore, me sektorët apo grupe të ndryshme të interesit, ku janë përfshi kryetarët e Këshillave Lokal në Malishevë, përfaqësues nga arsimi, shëndetësia, bizneset dhe OJQ-të, ka njoftuar Komuna e Malishevës.
“Pas njoftimit me buxhetin e planifikuar, pjesëmarrësit në këto dëgjime, i kanë paraqitur kërkesat e tyre për hartimin e buxhetit, përkatësisht për orientimin e buxhetit të planifikuar për investime, në mënyrë që investimet të krijojnë mirëqenie dhe zhvillimin për Komunën e Malishevës dhe për këtë qëllim, edhe janë duke u mbajtur këto dëgjime publike”, thuhet në njoftimin për media.
