Vizita në Republikën e Kosovës bën pjesë në planprogramin e Papa Françeskut.
Këtë e ka konfirmuar vet ai për revistën spanjolle “Vida Nueva“.
Megjithatë, i njëjti ka deklaruar se një gjë e tillë nuk mbetet e përcaktuar.
“Jemi duke punuar për vizitë në Kosovë, por asgjë nuk është vendosur”, tha Papa Françesku.
“Mund të konfirmoj që është në program. Do të shohim nëse mund të bëhet, pasi të përfundojë viti zgjedhor. Pasi të kenë përfunduar zgjedhjet, mund të bëhet. Për momentin mendoj vetëm për Argjentinën… dhe ndoshta Uruguain. Tashmë ka pasur disa përpjekje më parë, por zgjedhjet e prishën vizitën”.
Tutje, Papa Françesku ka deklaruar se po mendon të përcaktoj një ndërmjetësues në mes Ukrainës dhe Rusisë për të zhvilluar negociatat e paqes.
“Kardinali Matteo Zuppi, Kryepeshkop i Bolonjës, po punon fort si përgjegjës për dialogët. Ai tashmë shkoi në Kiev, ku ideja e fitores ruhet pa zgjedhur ndërmjetësimin. Ai ishte edhe në Moskë, ku gjeti një qëndrim që mund ta cilësojmë si diplomatik nga ana e Rusisë. Përparimi më domethënës që është arritur ka të bëjë me kthimin e fëmijëve ukrainas në vendin e tyre. Ne po bëjmë gjithçka në fuqinë tonë për të siguruar që çdo anëtar i familjes që pretendon kthimin e fëmijëve të tyre mund ta bëjë këtë. Për këtë po mendoj të caktoj një përfaqësues të përhershëm që të shërbejë si urë lidhëse midis autoriteteve ruse dhe ukrainase. Për mua, në mes të dhimbjes së luftës, është një hap i madh”, ka deklaruar ai.
