Presidenti amerikan, Joe Biden dje priti kryeministren italiane, Giorgia Meloni në Shtëpinë e Bardhë, disa muaj pasi shprehu skepticizëm për ardhjen e krahut të djathtë në krye të Qeverisë së Italisë.
Të dy zyrtarët kanë bërë një deklaratë të përbashkët rreth zhvillimeve të fundit në Ballkanin Perëndimor, në veçanti situatën në Kosovë.
“Shtetet e Bashkuara dhe Italia riafirmojnë angazhimin e tyre të përbashkët për sigurinë, stabilitetin dhe prosperitetin e Ballkanit Perëndimor dhe mbështetjen e tyre të gjatë për integrimin euroatlantik të rajonit”, shkruan në deklaratë.
“Ata janë të vendosur të përforcojnë koordinimin për të favorizuar de-eskalimin dhe pajtimin duke marrë për bazë rolin vendimtar të Quintit”, shkruan më tutje.
Shtetet e Bashkuara mirëpresin angazhimin e qeverisë italiane në Ballkanin Perëndimor, duke përfshirë kontributin e forcave të armatosura italiane në misionet e KFOR-it, EULEX-it dhe EUFOR Althea.
Ndërkohë, Shtëpia e Bardhë e konsideron si partnere të fortë kryeministren në ndihmën që po i jep Ukrainës, e cila po përballet me agresionin rus.
Ndryshe, Italia me Melonin ka shprehur gatishmërinë për ta tërhequr Italinë nga Iniciativa e Kinës, “Belt and Road”.
