Një delegacion të rinjsh nga Izraeli po qëndrojnë tash e disa ditë në Kosovë, ndërkaq sot kanë vizituar Ministrinë e Zhvillimit Rajonal. Nga takimi u theksua roli i rinisë në ndërtimin e një paqeje të qëndrueshme në proceset me karakter ndërkombëtar të Kosovës.
Drejtori Ekzekutiv i organizatës që është nikoqir i kësaj vizite, Institutit Cilësor për Hulumtime Analiza dhe Trajnime, Besmir Kokollari, theksoi se ky bashkëpunim do të ndikoj për ngritje të kapaciteteve vendore e ndërkombëtare.
“Punëtoria PRI-MUN2023 ka kontribuar edhe në komponentin për shkëmbime rinore – youth exchange në nivel vendor, rajonal dhe ndërkombëtar e cila do të ndikon në nxitjen e të rinjëve tanë për angazhim në komunitet, përfshirje në jetën publike, rrjetëzime, ngritje të kapaciteteve dhe aftësim në identifikimin e sfidave dhe problematikave me të cilat ballafaqohen të rinjët”, ka deklaruar Kokollari.
Ministrja e Punëve të Jashtme, Donka Gervalla- Shchfarz zhvilloi debat me të rinjtë nga Izraeli për angazhimin e ministrisë që drejton dhe politikat e jashtme të Kosovës. Politika e jashtme, ekonomia, inovacioni, arsimi e kultura ishin disa nga temat të cilat u shtjelluan përgjatë takimit me profesorët, studentët e nxënësit nga Izraeli.
“Delegacioni nga Izraeli u zotuan që janë të interesuar të angazhojnë të rinjë nga Kosova në Izrael”, thuhet tutje në komunikatë.
Punëtoria “PRI-MUN2023” si arsye e ardhjes së delegacionit, ka përgatitur temat për organizimin e simulimit të OKB-së për vitin 2023 në Kosovë “Model United Nations”- Modeli i Kombeve të Bashkuara” organizim ky i cili do të mbahet në dhjetor të këtij viti.
