Tre turistët çekë, të cilët mbetën të bllokuar për disa orë për shkak të terrenit të vështirë në vendin e quajtur Curraj i Epërm, janë shpëtuar nga policia.
Policia e Tropojës, në bashkëpunim me ekipin e qendrës shëndetësore të fshatit Lekbibaj, kanë ndërhyrë në këmbë për të kontrolluar zonën. Pas disa orësh kërkimesh intensive në tërrenin e thepisur të Valbonës, kanë bërë të mundur gjetjen e turistëve, në vendin e quajtur “Maja e Boshit”.
Punonjësit e Policisë fillimisht i nxorën turistët nga terreni i rrëzikshëm ku ishin bllokuar dhe më pas i kanë transportuar të tre shtetasit çek, për rreth 2 orë, deri në Bjeshkët e Vashqefenit, ku ishte e mundur ulja e helikopterit.
Mësohet se ata u shpëtuan pas dy operacioneve të kryera nga ekuipazhi i helikopterit të Forcës Ajrore EC 135. Pas shpëtimit, ata janë në gjendje të mirë shëndetësore.
Drejtor i Përgjithshëm i Qendrës Kombëtare të Urgjencës Mjekësore të Shqipërisë, Skënder Brataj ka reaguar ashpër në rrjetet sociale pas lajmit të misioni për shpëtimin e disa turistëve cekë në bjeshkët shqiptare midis Valbonës dhe Thethit, ku u përfshin forca të rendit dhe helikopterë.
“Vazhdojnë aventurat e pa kontrolluara të turizmit malor! Tre të rinj nga Çekia përfundojnë afër greminës, ku u bllokuan për dy ditë pasi kishin humbur rrugën dhe pa ditur ku të shkojnë! Si është e mundur që për të disatën herë turistët lëvizin pa udhërrëfyes?” thotë mjeku në postimin e tij.
Brataj shton se “ky nuk është turizëm, kjo do të thotë të diskutosh jetën! Rrezik jete për personelin mjekësor, rrezik jete për punonjësit e policisë, por akoma më shumë rrezik jete për pilotët! Stop aventurave ku rrezikohet jeta!”, ishin fjalët e tij.
https://www.facebook.com/1295173364/videos/pcb.10227196782367460/429091879168954 https://www.facebook.com/1295173364/videos/pcb.10227196782367460/1081913499426157 https://www.facebook.com/1295173364/videos/pcb.10227196782367460/974217926582562
