Pavarësisht që Kosova u furnizua me dronët Bayraktar, deklarata e KFOR-it i doli në rrugë entuziazmit të madh të Qeverisë për blerjen e tyre. Pavarësisht që misioni i NATO-s nuk lejon që ata të fluturojnë në qiellin e Kosovës, njohësit e sigurisë po vlerësojnë se Kosova nuk gaboi në blerjen e tyre.
Tashmë arma më e rëndë që e posedon Kosova janë dronët Bayraktar TB-2.
Por ky shkatërrues i mjeteve më të mëdha ushtarake me fuqi dhe shpejtësi të lartë nuk lejohet të veproj në Kosovë.
Kjo pasi, sipas KFOR-it hapësira ajrore e Kosovës mund të përdoret vetëm për fluturime komerciale, e jo edhe për ato ushtarake.
Pavarësisht kësaj, sipas njohësit të rrethanave të sigurisë, Nuredin Ibishi, Kosova nuk bëri gabim që i bleu dronët.
“Asgjë nuk pengon që ato pajisje ne t’i kemi dhe shumë mirë është bërë që i kemi porositur pasi që ne çdoherë pretendojmë të pajisemi me armatime dhe pajisje të reja ushtarake sikur që janë këto”, ka deklaruar Nuredin Ibishi, njohës i çështjeve të sigurisë.
Ndërsa, sipas anëtarit të Komisionit Parlamentar për Siguri, Hisen Berisha, Kosova nuk e ka shkelur rezolutën 1244 me blerjen e dronëve.
“Edhe komandanti i KFOR-it dhe të gjithë ata që shqetësohen duhet ta dinë që nuk jemi ndesh me rezolutën 1244, nuk jemi ndesh sepse kjo rezolutë e ka fut Kosovën në një proces politik i cili përmes bisedimeve ka ardhur në përfundim që ky territor mund të vetmenaxhohet në mënyrë autonome”, ka deklaruar Hisen Berisha, nga Komisioni për Siguri.
Atij gjithsesi po i pengon fakti që Qeveria në krye me Albin Kurtin ka marrë meritat për blerjen e tyre.
“Nuk është meritë as e Kryeministrit, as e ministrit, as e imja as e askujt. Është meritë e planifikimit që ka bërë FSK-ja, oficerët dhe stafi profesional, partnerët strategjikë dhe këto blerje janë me plan e afat”, ka deklaruar Berisha.
Qeveria e Kosovës për blerjen e dronëve Bayraktar ka njoftuar ditën e diel dhe nuk kanë dhënë detaje për numrin e tyre apo koston.
