Miratimin e dy vendimeve mbrëmë në Kuvendin e Kosovës, e ka kritikuar të premten Partia Demokratike e Kosovës. Në një konferencë për media, deputetja Blerta Deliu-Kodra tha se në koordinim me Listën Serbe, Qeveria ka përjashtuar veteranët e UÇK-së prej pagës minimale.
Ajo po ashtu përmendi edhe miratimin për formimin e institutit për krimet e kryera gjatë luftës në Kosovë. Sipas saj, me gjithë deklarimin e kryeministrit Albin Kurti se ky institut do të hetoj krimet e kryera për vitet 98-99, në fakt vendimi përfshin periudhën deri në fund të vitit 2000.
“Qeveria ka marrë disa vendime skandaloze. Mbrëmë qeveria Kurti apo qeveria Zdravo është koordinuar me Radojçiqin për të përjashtuar veteranët nga ligji për pagën minimale… PDK do të jetë konsistente për ta ndalur qasjen e kësaj qeverie që po koordinohet me Radojçiqin”, ka thënë Deliu-Kodra.
E në anën tjetër, koordinatori i PDK-së në kabinetin për qeverisje të mirë të kësaj partie, Arben Mustafa, tha se me përjashtimin e veteranëve nga rritja e pagës minimale, është bërë diskriminimi i tyre.
“Kjo pagë minimale ishte propozuar nga kjo qeveri vite më parë dhe në atë kohë nga qytetarët ishte konsideruar e pamjaftueshme. Në ndërkohë në Kosovë ka ndodhur një rritje shumë e madhe e çmimeve që po varfëron qytetarët e Kosovës. Qeveria e Kosovës dhe deputetët e partisë në pushtet e kanë shpërfillur rritjen e çmimeve në Kosovë dhe kanë votuar për një pagë minimale aq sa ka qenë e propozuar vite më parë”, ka thënë ai.
Deliu-Kodra ka folur edhe për përleshjen në Kuvendin e Kosovës të enjten. Ajo ka përsëritur qëndrimin e PDK-së se dhuna u provokua nga zëvendëskryeministri Besnik Bislimi. Ka shtuar se veprimet e dhunshme “kanë ndodhur për ta larguar vëmendjen e opinionit prej aferës Zdravo”.
“Kjo dhunë nuk është provoku prej PDK. Dhuna është provoku prej zv.kryeministrit. Pasojat i bart Kosova por përgjegjësia i takon atyre…. Sa i përket padive, konform asaj dhunës duhet me pas padi. Edhe z. Lushtaku edhe të tjerët do t’i marrin masat e tyre. Nuk kemi qenë ne nxitës nuk kemi provokuar dhunë, veprimet e PDK- së kanë qenë më demokratike se kurrë, Qeveria duhet me ofru përgjegjësi kryeministri duhet me fol e nuk duhet me i pengu deputetët”, ka shtuar ajo.
