Kosova është ndër shtetet evropiane me nivelin më të ulët të shkallës së varësisë nga mosha e shtyrë, sipas të dhënave të “Eurostatit”, të prezantuara në një hartë nga faqja e specializuar e statistikave “Landgeist” së fundmi.
Një nga kërcënimet më të mëdha me të cilin po përballen shtetet evropiane është pikërisht kjo shkallë. Kjo nënkupton kur shteti ka përqindje të lartë të njerëzve të moshuar, e që duhet të përkrahen nga grupi i vogël i njerëzve që janë në moshë pune, e që është përllogaritur të jetë 15 deri 64 vjeç.
Sipas të dhënave të “Eurostatit”, Kosova hyn në grupin e parë të shteteve “më të favorizuara”. Sipas të dhënave, në Kosovë për çdo 100 persona të grupmoshës së lejuar për punë, janë më pak se 20 persona të moshës mbi 65 vjeç. Në të njëjtin grup hyjnë vetëm edhe Turqia e Andorra.
Rajonet më të rrezikuara nga kjo shkallë janë në Suedi, Finlandë, Gjermani, Spanjë, Portugali, Itali dhe Greqi. Në këto vende, për çdo 100 persona në grupmoshë pune, janë mes 40 dhe 52 persona që janë në pension.
Sa më e ulët vlera e raportit nënkupton që ka mjaftueshëm njerëz në moshë pune që mund t’i përkrahin financiarisht pensionistët apo njerëzit në moshë të shtyrë. Sa më e lartë të jetë vlera e raportit, nënkupton që ka presion financiar në popullatën që hyn në kuadër të grupit në moshë pune për t’u ndihmuar të moshuarve. Kjo nënkupton po ashtu edhe presion në sistemet shëndetësore, pasi konsiderohet se më shumë njerëz do t’i shfrytëzojnë shërbimet dhe një grup më i vogël i njerëzve duhet t’i përkrahë financiarisht.
Shkalla e lartë e varësisë nga mosha e shtyrë zakonisht gjendet në shtetet e pasura e me natalitet të ulët. Sidomos në shtetet që kanë përjetuar “shpërthim rritjeje” pas Luftës së Dytë Botërore, që si gjenerata tashmë po pensionohen.
