Pasi propozimi i Qeverisë u hodh në votim në mbledhjen e së enjtes, Rashiqi ishte i vetmi nga kabineti që votoi kundër.
Ai kërkoi nga ministri i Punëve të Brendshme, Xhelal Sveçla, që ta rishqyrtojë propozimin, e të mos “merren vendime të ngutshme”.
“Disa propozime janë të ngutura dhe mendoj se duhet të ecim me shumë kujdes. Me respekt ndaj jush ministër, ju jeni punëtor. Ju lus që nëse ka mundësi sërish të mendoni që edhe një herë të shohim këtë propozim dhe vendim, sepse frikësohem se do të ndahemi nga bashkëbiseduesit tanë në veri. Qasja e tillë do të na largoj shumë”, tha Rashiq.
Mirëpo, propozimi i tij nuk u mor parasysh dhe në fund kabineti qeveritar votoi me shumicë që “Mbrojtja civile” dhe “Brigada e Veriut” të shpallen organizata terroriste.
E Sveçla iu përgjigj se shpallja e këtyre organizatave si terroriste është kruciale për qytetarët.
Ai gjithashtu tha se ky vendim nuk i prek pjesëtarët e këtyre dy organizatave që janë integruar më herët.
“Ky vendim nuk prek askënd i cili deri në momentin e shpalljes së organizatave terroriste ka qenë pjesë e këtyre organizatave e nuk ka kryer vepra penale tashmë. Pra, nuk vihen në rrezik pjesëtarët e këtyre organizatave që janë integruar më herët”, deklaroi ministri.
Ndërkaq zëvendëskryeministri Besnik Bislimi i është drejtuar ministrit Nenad Rashiq.
“Pretendimi se ka vakuum të sigurisë. Nuk mund të ekzistojë vakuum pa u mbushur nga dikush!”, është shprehur Bislimi.
“Brenga e dytë ka të bëjë me faktin që atje po vërehen më shumë ‘shkopinjtë’ se ‘karrota’. Nuk mund prej shtetit të ketë ‘karrota’ për grupet kriminale”.
Bislimi ka thënë se si qeveri janë përpjekur që të ndërhyjnë në pjesën veriore me mjete financiare për ta lehtësuar jetën e qytetarëve.
“Shteti e ka për obligim që t’i mbrojë qytetarët nga grupet kriminale. Asnjë masë nuk është e drejtuar ndaj qytetarëve të zakonshëm”.
