Ish-ndihmësi i trajnerit të njohur turk, Fati Terim është emëruar kryetrajner i skuadrës së rikthyer në elitën e futbollit kosovar, Liria.
Është 51-vjeçari Nedim Yigit, ai, i cili do ta drejtojë klubin prizrenas në Superligën e Kosovës, pas një përvoje të gjatë në futbollin e Turqisë në role të ndryshme në Galatasaray, Goztepe, Gaziantepspori, Altinordu dhe Bashakshehir. Yigit ka qenë ndihmësi i Terimit në Kombëtaren e Turqisë nga viti 2016 deri në vitin 2018, derisa së fundmi ishte trajner i skuadrës së kategorisë së tretë, Iskenderunspor. “Do të bëjmë punë të mira. Do të jap gjithë dijen time që ekipin ta dërgojmë në nivele të larta”, ka thënë trajneri turk me rastin e prezantimit si trajner i Lirisë.
Në klubin prizrenas janë shprehur të lumtur që Yigit ka pranuar të jetë timonier i skuadrës. “Sot kemi arritur marrëveshje me trajnerin e njohur turk, Nedim Yigit, i cili do ta udhëheqë ekipin e Lirisë në Superligën e Kosovës në edicionin 2023/24. Ish-ndihmës trajneri i kombëtares së Turqisë me përvojën e tij të madhe do të na ndihmojë që FC Liria të vazhdojë me suksese në futbollin kosovar. Nuk do të ndalemi, ky është veç fillimi. Forca Liria!”, ka shkruar kreu i FC Liria, Rrahman Kice.
