Ministri i Mbrojtjes, Armend Mehaj në 145 vjetorin e themelimit të Lidhjes së Prizrenit, ka thënë njëra nga aktet më të rëndësishme të Kuvendit të Prizrenit ka qenë vendimi për themelimin e një organizate me karakter politik e ushtarak.
“Njëra nga aktet më të rëndësishme të Kuvendit të Prizrenit ka qenë vendimi për themelimin e një organizate me karakter politik e ushtarak, të një Lidhjeje, me një qendër të vetme drejtuese dhe me degë të saj në të gjitha krahinat e vendit, e cila do të merrte përsipër detyrën që të mbronte me çdo mjet interesat e vendit”, ka shkruar Mehaj.
Mehaj është shprehur se edhe gjatë kësaj dite është e nevojshme të kujtohen porositë e Lidhjes së Prizrenit sepse sipas tij, duke qenë të bashkuar mund t’i mbrojmë interesat kombëtare, duke theksuar se “kemi qenë këtu zot shtëpie dhe të tillë do të mbesim”.
“Ende sot e kësaj dite është e nevojshme, është e domosdoshme që të rikujtojmë porositë e Lidhjes Shqiptare të Prizrenit sepse duke qenë të bashkuar, vetëm duke qenë të bashkuar mund të arrijmë të mbrojmë interesat tona kombëtare, arrijmë të mbrojmë vendin dhe tokën tonë”, ka shkruar ministri i Mbrojtjes.
“Gjithashtu, vetëm në këtë mënyrë ju bëjmë me dije të gjithëve dhe varrosim përgjithmonë ëndrrat dhe idetë që dikush mund të prek pjesë të territorit tonë. Kemi qenë këtu zot shtëpie dhe të tillë do të mbesim”, ka thënë tutje Mehaj.
Këtë të shtunë mbushen 145 vjet që kur më 10 qershor të vitit 1878 ka filluar organizimi dhe themelimi i Lidhjes Shqiptare të Prizrenit.
Është kjo njëherësh një ndër Lidhjet më të organizuara politike gjithëkombëtare pas Lidhjes dhe themelimit të Kuvendit të Lezhës të marsit të vitit 1444, nën organizimin e Gjergj Kastriotit-Skënderbeut dhe udhëheqësve të principatave, përkatësisht të princave shqiptarë në shekullin e 15.
Lidhja Shqiptare e Prizrenit në historinë e popullit shqiptar të kohës së re, historikisht është tubimi më i rëndësishëm kombëtar shqiptar.
